राज्य रा ऊगणी हलका मांय बरस रह्या ज़बरदस्त मेह रे कारण कोटा, बूंदी, बारां अर सवाईमाधोपुर ज़िलां मांय बाढ़ सरीखा हालात बण ग्या है। सेना, एनडीआरएफ अर एसडीआरएफ री टीमां न्यारी-न्यारी ठौड़ां फस्योड़ा 200 ऊं बत्ता लोगां ने दूजी ठौड़ां पूगायी ज्या। गृहराज्य मंत्री जवाहर सिंह बेढ़म अर आपदा राहत मंत्री डॉ. किरोड़ी लाल मीणा थवर ने सवाईमाधोपुर ज़िला रा सूरवाल, अजनोटी अर मैनपुरा समेत घणी बिरखा रा असर वाळा अर दूजा हलकां रो दौरो कर र हालात रो जायज़ो लीनो। दूजी कानी लोकसभा अध्यक्ष ओम बिरला ने कोटा-बूंदी संसदीय हलका रा हवाई सर्वे रो कार्यक्रम खराब मौसम रे कारण टाळणो पड़्यो। ईं बीचे कोटा संभाग मांय भारी बारिश रो सिलसिलो थावर ने ई चालतो रह्यो। कोटा बैराज रा दो दरूजा खोल र 14 हजार क्यूसेक पाणी निकाळी ज्यो। घणी बरसात रे कारण 100 ऊं बत्ता गांव कोटा ऊं न्यारा रह ग्या है। करौली ज़िला रा पांचना बंधा ऊं ई चार दरूजा खोल र बत्तो पाणी निकाळ्यो जा रह्यो है। मण्डरायल मांय चम्बल नदी ई खतरा रा निशान ने पार कर ग्यी है। धौलपुर मांय ई ज़िला प्रशासन चम्बल नदी री कोर कने बस्योड़ा सगळा गांवां मांय हाई अलर्ट रो ऐलाण कर दीनो है। लगातार व्हे रही भारी बारिश रे कारण केई गांव टापू बण ग्या है। घणी बरसात रे कारण घरां अर खेतां मांय पाणी भर ग्यो है अर कच्चा मकान पड़ ग्या है। लारला 24 घंटां मांय कोटा, बूंदी, टोंक, करौली, बारां, जयपुर अर सवाईमाधोपुर ज़िलां मांय केई ठोड़ां घणी भारी बारिश व्ही। सवाईमाधोपुर मांय थावर ने लगातार तीजा दिन रूक-रूक र बरसात व्हेती रही। ज़िला कलेक्टर कानाराम हालात रो ध्यान राखता थकां जनता ऊं पाणी भरण अर तेज़ बहाव री ठौड़ां कने नी जावण री अपील कीनी है। सिरोही ज़िला मांय ई आबूरोड़, पिण्डवाड़ा अर स्वरूपगंज समेत केई ठौड़ां चोखो मेह बरस्सो। झुन्झुनू ज़िला रा चिड़ावा, सुल्ताना अर आरे-सारे रा हलकां मांय दोपहरां री बगत झमाझम बारिश व्ही। चूरू अर कोटपूतली-बहरोड़ मांय ई चोखी बिरखा व्हे रही है। बांसवाड़ा, डीग, श्रीगंगानगर, चूरू , कोटपूतली-बहरोड़ अर बारां मांय ई बिरखा रा समाचार है। थावर ने चित्तौड़गढ़ अर भीलवाड़ा मांय मूसलाधार बारिश रो रेड अलर्ट जारी करी ज्यो है। ईं रे अलावा नौ ज़िलां सारू ऑरेंज अर केई ठौड़ां सारू येलो अलर्ट जारी करी ज्यो है। मौसम केन्द्र जयपुर रा निदेशक राधेश्याम शर्मा बतायो के कोटा, बारां अर बूंदी मांय आवता दो दिन तांई तेज़ बरसात रा आसार है।