राज्य रा आतूणी हलका मांय घणखर ठौड़ां दिन री बगत तापमान 43 ऊं 46 डिग्री सेल्सियस बीचे नाप्यो जा रह्यो है। प्रदेश रा ऊगणी हलका मांय ई पारो 40 ऊं 45 डिग्री सेल्सियस बीचे दर्ज कर्यो जा रह्यो है। मौसम विभाग रे मुजब आज बाड़मेर, जैसलमेर अर जोधपुर ज़िलां मांय लू रो असर रह्यो। लारला चौबीस घंटां मांय जैसलमेर मांय अधिकतम तापमान 46 दशमलव 3 डिग्री सेल्सियस रह्यो। बाड़मेर अर जैसलमेर ज़िला मांय काल ई कठे-कठे लू बाजण रा आसार है। काल दोपहरां पाछे जोधपुर, बीकानेर, अजमेर, जयपुर, कोटा अर भरतपुर संभाग रा कुछ हलका मांय गरज सागे हल्की बारिश री संभावना है। ईं दौरान ज़ोरदार बायरो बाजण रा ई आसार है।