राज्य मांय लारलाएक हफ्ता ऊं सक्रिय मॉनसून अबै सगळा हलका मांय पूग ग्यो है। मौसम महकमो शुक्रवार ने 23 ज़िलां मांय बिरखा रो अलर्ट काड्यो है। इण रे साथै ई उदयपुर, जयपुर अर भरतपुर संभाग मांय बिरखा री गतिविधियां आवता एक हफ्ता तांई चालता रहवण री आस जतायी है। ई बीचे आवता दो दिनां मांय कठेई-कठेई भारी बिरखा ही व्हे सके है। पाली ज़िला रा रानी, खीमेल, विद्याबाड़ी अर आरे-सारे रा हलका मांय ं घंटाभर मूसलाधार बिरखा व्ही। करौली, धौलपुर, झालावाड़, जैसलमेर अर आरे-सारे रा हलकां मांय हळका ऊं मझला दर्जा री बिरखा व्ही। बारां रा केलवाड़ा मांय ई ज़ोरदार बिरखा रा समचार है। राजधानी जयपुर मांय ई गुजरी रात रूक-रूक ने बिरखा रो दौर चाल्यो। बूंदी, बारां, झालावाड़, चित्तौडगढ़, उदयपुर, कोटा, भीलवाड़ा, टोंक, करौली, सिरोही, प्रतापगढ़ मांय ई 1-1 सेंटीमीटर बिरखा दर्ज व्ही। लारला चौबीस घंटां मांय ं सब ऊं बत्ती 13 सेंटीमीटर बिरखा बांसवाड़ा रा सज्जनगढ़ मांय व्ही। ज़िला रा सल्लोपाट, वेजा, अरथूना, कुशलगढ़ मांय ई झमाझम बिरखा व्ही। इण रे अलावा डूंगरपुर, बारां, दौसा अर जयपुर रा जमवारामगढ़ मांय ई 6 सेंटीमीटर ऊं बत्ती पाणी बरस्यो। चोखी बिरखा ऊं बंधां मांय पाणी री आवक बण्योड़ी है। कोटा ऊं म्हाणा खबरनवीस बतायो के कोटा बैराज अर जवाहर सागर अर राणा सागर बंधा समेत दूजा छोटा-मोटा बंधा मांय बिरखा रो सिलसिलो बण्योड़ो है। जून मीना मांय चम्बल नदी माथे बण्या तीनू बंधा लबालव व्हे ग्या है। बीसलपुर बंधा रो जल थर आज तीजे दिन ई बध्यो अर ओ 312 दशमलव 57 आरएल मीटर तांई पूग ग्यो है।