राज्य मांय बत्ती बिरखा सूं प्रभावित हलका मांय जिला प्रभारी मंत्रियां अर प्रभारी सचिवां रा दौरा लगातार चाल रह्या है। वे संबंधित अहलकारां सागे मेह बरसबा सूं बण्या हालात अर फसल खराबा बाबत समीक्षा कर रह्या है। उपमुख्यमंत्री अर राजसमंद जिला प्रभारी मंत्री डॉ. प्रेमचंद बैरवा दीतवार ने जिला कलेक्ट्रेट मांय जिला स्तरीय समीक्षा बैठक करी। वे अहलकारां ने निर्देश दिया के बत्ती बिरखा रे बीच किणी भी आपात स्थिति सूं निपटबा खातर प्रशासन पूरी भांत तैयार रेहवे। डॉ. बैरवा कह्या के किणी भी टेम अनहोनी, जलभराव अर इण भांत री कोई खबर मिले तो तुरंत राहत अर बचाव री कार्यवाही सरू व्हेणी चाहिजे। बारां जिला रा प्रभारी मंत्री ओटाराम देवासी भी जिला मुख्यालय माथे अहलकारां री बैठक ले र अतिवृष्टि रा हालात री समीक्षा करी। वणां कह्या के प्रशासन ने आपदा प्रभावित लोगां तांई तुरंत सहायता पुगाणी चाहिजे। वे कह्या के इण मांय किणी भी भांत री कोताही बर्दाश्त नीं करी जावेला। श्री देवासी हाल तांई व्ही मानसूनी बरसात रा आंकड़ां अर अतिवृष्टि री वजह सूं व्हीया नुकसान अर आपदा मांय मरबा वाळा रा घराळा ने दी जाबा वाळी सहायता री भी विस्तार सूं सीमक्षा करी। कोटपूतली-बहरोड़ ज़िला रा दौरा माथे आया प्रभारी मंत्री विजय सिंह अहलकारां रे सागे हलका रो दौरो कर भारी बिरखा वाळा हलका रो जायजो कर्यो। इण बीच आपदा प्रबंधन मंत्री किरोड़ी लाल मीणा कह्या के फसल खराबा रो सर्वे बेगी ही पूरो कर काश्तकारां ने उचित मुआवजो दियो जावेला।