राज्य मांय दिन अर रात रो तापमान 2 ऊं 3 डिग्री सैल्सियस तांई उतर्यो है। काल सरू व्ह्यो आंधी बारिश रो दौर आज ई झालावाड़, नागौर, चूरू अर कोटपूतली-बहरोड़ समेत केई ठौड़ां चालतो रह्यो। जयपुर, हनुमानगढ अर नागौर जिलां मांय ओळा पड्या। नुवा पश्चिमी विक्षोभ रा असर ऊं भरतपुर, दौसा, वनस्थली, बीकानेर अर सीकर समेत केई ठौड़ां आंधी चाली अर छांटो-छिड़को व्ह्यो। सवाईमाधोपुर, झालावाड अर हनुमानगढ़ मांय तेज गर्मी अर तीखा तावड़ा पाछे दोपहरां री बगत छांटो-छिड़को व्ह्यो। दूजी कानी कठे-कठे लू रा हालात रह्या। बाड़मेर मांय पारो 44 डिग्री सैल्सियस ने पार कर ग्यो। डबोक अर श्रीगंगानगर मांय अधिकतम तापमान 43 डिग्री सैल्सियस ऊं ऊंचो रह्यो। घणखर ठौड़ां दिन री बगत तापमान 40 डिग्री सैल्सियस ऊं बत्तो दर्ज कर्यो जा रह्यो है। मौसम केन्द्र जयपुर रा निदेशक राधेश्याम शर्मा बतायो के काल पश्चिमी विक्षोभ रो असर और बत्तो निजर आवेला। तेज गर्मी अर लू ने ध्यान राखता थकां मुख्यमंत्री भजन लाल शर्मा ज़िला कलेक्टरां ने आपातकालीन योजना रे मुजब 15 मई तांई पीवण रा पाणी रा ज़रुरी प्रबंध तैय करण रा हुकम दीना है।