राज्य मांय घणखर ठौड़ां चौमासा री बिरखा व्हेवण लागी है। मौसम विभाग थावर ने पाली, जोधपुर, जालौर, अजमेर, भीलवाड़ा अर चित्तौड़गढ़ मांय भारी बारिश व्हेवण सारु चेतायो है अर केई ज़िलां मांय ज़ोरदार बायरो बाजण सागे बिरखा व्हेवण रा आसार जताया है। बारां, कोटा, बूंदी, नागौर, राजसमंद, बीकानेर, बाड़मेर, अर जयपुर समेत केई ठौड़ां बरसात रो येलो अलर्ट जारी करी ज्यो है। मौसम केन्द्र जयपुर रा निदेशक राधेश्याम शर्मा बतायो के भरतपुर, कोटा अर जयपुर संभाग रा कुछ हलकां मांय आवता तीन दिन भारी बारिश व्हेवण री संभावना है।
लारला 24 घंटां मांय राज्य रा ऊगणी हलकां मांय भारी ऊं घणो भारी मेह बरस्यो। सब ऊं बत्तो 17 सेंटीमीटर पाणी टोंक ज़िला रा निवाई मांय बरस्यो। चित्तौडगढ़, सवाईमाधोपुर, दौसा, बारां, बूंदी, कोटा अर जयपुर मांय ई चोखी बिरखा व्ही। प्रदेश मांय चौमासा री बिरखा सरु व्हेवण सागे ई केई ठौड़ां झरना बहवण लाग्या है। जोधपुर मांय खुशनुमा मौसम रो मज़ो लेवण सारु सैर-सपाटा री ठौड़ां सैलाणी निजर आवण लाग्या है। म्हाणा चित्तौड़गढ़ खबरनवीस बतायो के हरी-भरी वादियां बीचे मेनाल मांय सैलानियां अर गोठ मनावण वाळां री आवाजाही सरू व्हे ग्यी है।