राज्य रा केई ज़िलां मांय व्ही ज़बरदस्त बरसात ऊं जिन्दगी माथे घणो असर पड़्यो है। इसके साथ ही पूर्वी राजस्थान में विभिन्न स्थानों पर हुई अत्यंत भारी बारिश से व्यापक नुकसान के समाचार हैं। ईं सागे ई न्यारी-न्यारी ठोडां ई नुकसाण व्ह्यो है। टोंक, सवाईमाधोपुर, बारां अर कोटा मांय व्ही भारी बारिश पाछे हालात मुश्किल व्हे ग्या है। मौसम विभाग रे मुजब लारला चौबीस घंटा मांय सब ऊं बत्तो 25 सेंटीमीटर पाणी सवाईमाधोपुर मांय बरस्यो। ईं कारण दुकानां अर घरां मांय पाणी भर ग्यो अर केई कच्चा मकान ढस ग्या। म्हाणा खबरनवीस बतायो के चौथ का बरवाड़ा, मलारना डूंगर अर खंडार समेत केई ठोड़ां पाणी भर जावण ऊं घणी परेशानी व्हे रही है।
बूंदी ज़िला रा पाटन मांय 21 सेंटीमीटर बारिश व्ही। भीलवाड़ा ज़िला रा बिजौलियां अर जहाज़पुर मांय ई ज़ोरदार मेह बरस्यो। ज़िला मांय ऐरू नदी उफाण रही है। बारां जिला रा किशनगंज, मांगरोल अर अंता मांय मूसलाधार बारिश ऊं जिन्दगी माथे घणो असर पड़्यो है। कोटा मांय लारला बारह घंटा मांय दस इंच ऊं बत्तो पाणी बरस्यो। इण ऊं केई हलकां मांय पाणी भर ग्यो अर सड़कां माथे गाड़ियां फंस ग्यी।
बांसवाड़ा, चित्तौड़गढ़, प्रतापगढ़, डूंगरपुर, उदयपुर, पाली, जालौर अर जोधपुर समेत केई ज़िलां मांय 8 ऊं 10 सेंटीमीटर तांई मेह बरस्यो। नागौर, बाड़मेर, जैसलमेर, बीकानेर, दौसा, झालावाड़ अर अजमेर ज़िलां मांय ई केई ठोडां चोखी बारिश रा समाचार है। राजधानी जयपुर मांय ई शुक्रवार व्ही तेज़ बरसात ऊं केई ठोड़ां सड़कां माथे जाम लाग ग्यो। सिरोही ज़िला मांय तीन दिन ऊं रुक-रुक र व्हे रही बिरखा ऊं नदी-नाळां मांय पाणी रो लेवल बध रह्यो है। मौसम विभाग शुक्रवार कोटा, उदयपुर अर जोधपुर संभाग मांय कठे-कठे भारी ऊं घणी भारी बारिश रा आसार जताया है। अजमेर, भरतपुर अर जयपुर संभाग रा कुछ हलकां मांय ई भारी बारिश री संभावना है। विभाग रे मुजब प्रदेश मांय आवता सप्ताह तांई बारिश रो सिलसिलो चालतो रेहवण रा आसार है। ईं बीचे जबरदस्त बारिश रे कारण उपजा हालात ने ध्यान राखता थकां कोटा विश्वविद्यालय थावर ने व्हेवण वाळी सगळी परीक्षावां टाळ दीरीजी है। सवाईमाधोपुर मांय ई भारी बारिश रे कारण ज़िला कलेक्टर थावर ने स्कूलां मांय छुट्टी रो ऐलाण कर दीनो है।