राज्य मांय केई ठोड़ां आवता तीन-चार दिन तांई आंधी-बारिश रो दौर चालतो रेहवण रा आसार है। दूजी कानी राज्य रा आतूणी हलकां मांय लू रो असर बण्यो रेहवण री शंका है। मौसम विभाग रे मुजब जोधपुर, बीकानेर, उदयपुर, कोटा अर जयपुर संभाग रा कुछ हलकां मांय मंगलवार ने अंधड़ आवण सागे हल्की बिरखा व्हेवण री संभावना है। ईं बीचे लारला चौबीस घंटां मांय बांसवाडा, डूंगरपुर अर प्रतापगढ मांय रिमझिम बरसात व्ही। बाड़मेर, जोधपुर, फलौदी, कोटा अर चित्तौड़गढ़ मांय ज़ोरदार गर्मी अर लू रो असर रह्यो।