विधानसभा मंगलवार ने राजस्थान विधि विरुद्ध धर्म संपरिवर्तन प्रतिषेध विधेयक 2025 पास कर दीनो। इण रो मकसद राज्य मांय ज़बरदस्ती या धोखा ऊं धर्म मांय बदलाव करावण ने रोकणो है। ऐड़ी वारदातां रा दोषियां ने 7 ऊं 14 साल तांई री कैद अर 5 लाख रुप्या तांई रा जुर्माना रो प्रावधान ई करी ज्यो है। ईं रा तैत किण ई संस्था या संगठन री ओर ऊं गैर-कानूनी तौर ऊं किंण ई रा धर्म मांय बदलाव करावण परां संबंधित संस्था रा भवन ने जांच पाछे सील कर्यो जा सकेला या पाड़्यो जा सकेला। ईं बिल माथे चर्चा रे दौरान न्यारा-न्यारा दलां रा अर निर्दलीय सदस्य राय रखी, हालांकि कांग्रेस चर्चा मांय भाग नी लीनो। खबरनवीसां सागे बातचीत करता थकां गृह राज्य मंत्री जवाहर सिंह बेढम कह्यो के हाल ही मांय धर्म मांय ज़बरदस्ती बदलाव रा केई वाकया सामी आया है, ज्यां ने ध्यान राखता थकां ओ बिल लायी ज्यो है। मंगलवार ने सदन री कार्यवाही हंगामा रे कारण तीन दफा टाळणी पड़ी। प्रश्नकाल रे दौरान पख अर विपख रे बीचे ज़ोरदार बहस व्ही। सदन मांय विपख रा नेता टीकाराम जूली ने खानपुर हलका ऊं जुड़्या अपराधां रा बारा मांय पूरक सवाल पूछण री मंजूरी नी मिलण परां कांग्रेस रा विधायक खूब हंगामो कीनो। कांग्रेस रा सदस्य पंचायती राज अर स्थानीय निकायां रा चुनाव टेमसर नी करावण रे खिलाफ विधानसभा परिसर मांय प्रदर्शन कीनो।