राईजिंग राजस्थान इन्वेस्टमेंट समिट सारु निवेश लावण रा मकसद ऊं जापान अर दक्षिण कोरिया रो दौरो कर र मुख्यमंत्री भजनलाल शर्मा, उपमुख्यमंत्री प्रेमचंद बैरवा अर प्रतिनिधि मण्डल रा दूजा सदस्य आज जयपुर पाछा आ ग्या। जयपुर पूग्यां पाछे मुख्यमंत्री हवाई अड्डा ऊं खुली मोटरगाड़ी मांय भारतीय जनता पार्टी रा दफ्तर पूग्या, जठे राख्यी ज्या कार्यक्रम मांय मोटी तादाद मांय भाजपा रा कार्यकर्ता वां रो स्वागत कीनो। ईं मौके मुख्यमंत्री कह्यो के वां रा राज मांय प्रदेश रा विकास सारू केई खास जतन करी ज्या है। वे कह्यो के जापान अर दक्षिण कोरिया ऊं चोखो निवेश मिलण री आस है। मुख्यमंत्री कह्यो के प्रदेश मांय निवेश सारू उमाव निजर आ रह्यो है।