मौसम विभाग सोमवार ने कोटा, उदयपुर अर जोधपुर संभाग मांय कठे-कठे भारी बारिश रा आसार जताया है। पाली, राजसमंद, भीलवाड़ा, चित्तौडगढ, बूंदी, झालावाड़ अर कोटा मांय ज़बरदस्त बारिश सारु चेतायी ज्यो है। ईं सागे ई 10 ज़िलां मांय बरसात रो ऑरेंज अलर्ट जारी करी ज्यो है। मौसम केन्द्र जयपुर रा निदेशक राधेश्याम शर्मा बतायो के आवता दो दिन अजमेर अर जयपुर संभाग मांय कठे-कठे घणी भारी बिरखा व्हेवण रा आसार है। ईं बीचे काल सब ऊं बत्ती करीब 20 सेंटीमीटर बरसात कोटा ज़िला रा खातोली मांय दर्ज करी ज्यी। बारां, कोटा, बूंदी, राजसमंद, डूंगरपुर, धौलपुर, बांसवाडा अर जोधपुर ज़िलां मांय ई 10-10 सेंटीमीटर ऊं बत्तो पाणी बरस्यो। प्रदेश मांय बरस रह्या ज़ोरदार मेह रे कारण न्यारी-न्यारी ठौड़ां पाणी भर ग्यो अर आवण-जावण मांय अड़चन आ रही है। केई ठौड़ां गांवांई हलकां रो खास गेलां ऊं संपर्क टूट ग्यो है। ज़ोरदार बारिश रा असर वाळा हलकां मांय प्रशासन सावचेत है अर लोगां ऊं सुरक्षित ठोड़ां रेहवण री अपील करी जा रही है। एसडीआरएफ री टीमां ई तेज़ बहाव वाळा हलकां मांय बचाव रा कामां मांय लाग्योड़ी है। जोधपुर ज़िला मांय पाली-मारवाड़ अर बोमादड़ा रेलवे टेशनां बीचे पटरियां हेटे ऊं मिट्टी बह जावण अर पटरियां हेटे पाणी भरण रे कारण रेलां री आवण-जावण माथे असर पड़्यो है। म्हाणा कोटा खबरनवीस बतायो के कोटा बैराज रे आरे-सारे चम्बल नदी रा पाणी भराव रा हलका मांय व्हे रही ज़ोरदार बारिश रे कारण बैराज रा 12 दरुजा खोल र बत्तो पाणी निकाळ्यो जा रह्यो है। ज़ोरदार बारिश रे कारण नदी-नाळां मांय पाणी उफण रह्यो है। चित्तौडगढ़ रा नीलिया महादेव कुंड मांय डूब जावण ऊं तीन जणां री मौत व्हे ग्यी, जदके कोटा मांय बरसाती नाळा मांय बह जावण ऊं एक युवती री मौत व्हे ग्यी। रावतभाटा मांय नाळा मांय बह जावण ऊं एक बच्चा री मौत व्हे ग्यी, जदके भीलवाड़ा री छाईबाई नदी मांय बह जावण रे कारण एक जणा री मौत व्हे ग्यी।