मौसम विभाग जयपुर अर बीकानेर संभाग रा कुछ हलकां मांय बुधवार ने भारी बारिश रा आसार जताया है, जद के कोटा संभाग मांय गुरुवार ने कठे-कठे तेज़ बारिश री संभावना है। प्रदेश रा ऊगणी अर आतूणी हलकां मांय बरसात रो ज़ोर कम व्हेवण रा आसार है। ईं बीचे लारला चौबीस घंटां मांय प्रदेश मांय सब ऊं बत्तो 8 सेंटीमीटर पाणी श्रीगंगानगर रा श्रीविजय नगर मांय बरस्यो। बांसवाडा, डूंगरपुर, अलवर, चित्तौडगढ़, कोटा, भरतपुर, अजमेर, बाड़मेर, जालौर, बीकानेर अर हनुमानगढ़ मांय ई बादळां री गाज़ सागे हल्की ऊं मझला दर्जा री बिरखा व्ही। इंर् बीचे लोकसभा अध्यक्ष ओम बिरला कोटा मांय व्ही ज़ोरदार बिरखा रा असर वाळा हलकां रो बुधवार ने दौरो कीनो अर मेह रे कारण व्ह्या हादसां रा शिकार लोगां रा पिरवारवाळां सागे मुलाकात कीनी। दूजी कानी करौली-धौलपुर रा सांसद भजन लाल जाटव करौली मांय अहलकारां सागे मीटिंग कर र पाणी भरण री ठौड़ां पिछाण कर र किण री भात री आपदा रो सामो करण सारू योजना बणावण रा हुकम दीना।