मुख्यमंत्री भजनलाल शर्मा री मौजूदगी मांय थावर ने वित्त विभाग अर पंजाब नेशनल बैंक बीचे एक करार माथे सही करीजी। जयपुर मांय मुख्यमंत्री रा रेहवास माथे व्ह्या ईं करार रा तैत राज्य सरकार री विकास री न्यारी-न्यारी योजनावां सारू पीएनबी री ओर ऊं माली मदद दी जावेला। श्री शर्मा थावर ने जयपुर मांय अमर जवान ज्योति ऊं रोड़वेज री दो सुपर लक्ज़री अर 160 ब्लू लाइन बसां ने हरी झण्डी बता र रवाना कीनी। सुपर लक्ज़री बसां जयपुर ऊं उत्तराखंड मांय कैंचीधाम बीचे चलायी जावेला। इण ऊं नीम करौली धाम जावण वाळां ने सहूलियत व्हेवण सागे धार्मिक पर्यटन ने ई बधावो मिलेला। ब्लू लाइन एक्सप्रेस बसां जयपुर रा चार डिपो अर हिण्डौन, दौसा, अजमेर, कोटपूतली, धौलपुर, सवाईमाधोपुर अर भीलवाड़ा रा बस डिपो ने दीरीजी है। रोड़वेज री नुवी बसां चालण ऊं आवण जावण रा बधता दबाव ने कम करण मांय मदद मिलेला। मुख्यमंत्री थावर ने जयपुर मांय व्ह्या गौ महाकुंभ मांय ई शिरकत कीनी। विद्याधर नगर स्टेडियम मांय राख्यी ज्या ईं सम्मेलण मांय मुख्यमंत्री गौवंश ने बधावण अर बचावण सारु राज्य सरकार री कोशिशां री जाणकारी दीनी। मुख्यमंत्री कह्यो के गायां ने बधावो देवणो देश री संस्कृति ऊं जुड़्यो है। वे कह्यो के राज्य सरकार बैलां ऊं खेती करण वाळां ने सब्सिडी दे रही है।