मुख्यमंत्री भजनलाल शर्मा जीएसटी ऊं जुड़्या ऐतिहासिक फैसला सारु केन्द्र सरकार रो आभार जतायो है। गुरूवार ने विधानसभा परिसर मांय खबरनवीसां सागे बातचीत करता थकां वे कह्यो के ईं फैसला ऊं जनता, किसानां अर गरीब तबका री जनता ने सब ऊं बत्तो फायदो मिलेला अर माली व्यवस्था ई तेज़ व्हेला। भारतीय जनता पार्टी रा प्रदेश अध्यक्ष मदन राठौड़ ई फैसला री हिमायत कीनी है। गुरूवार ने जयपुर मांय खबरनवीसां सागे बातचीत करता थकां वे कह्यो के इण ऊं समाज रा सगळा तबकां ने आराम मिलेला अर लोगां री ज़िंदगी आसान व्हेला।
जीएसटी सुधारां ऊं कारोबार जगत मांय ई खुशी रो माहौल है। फेडरेशन ऑफ ट्रेड एण्ड इंडस्ट्री-फोर्टी रा अध्यक्ष सुरेश अग्रवाल केन्द्र सरकार अर जीएसटी परिषद् री ओर ऊं करी ज्या फैसला रो स्वागत कीनो है।
ध्यानजोग है के जीएसटी परिषद जनता रा काम री न्यारा-न्यारा सामान माथे लागण वाळा वस्तु अर सेवा कर-जीएसटी री रेट 18 अर 12 फीसदी ऊं घटा र 5 फीसदी करण रो फैसलो कीनो है। अप्रत्यक्ष कर ढांचा मांय सुधार करता थकां परिषद मौजूदा चार स्लैब ने घटा र दो स्लैब कर दीनी है। 12 फीसदी अर 28 फीसदी री रेट खत्म कर दीरीजी है, जदके 5 अर 18 फीसदी री स्लैब बरकरार राख्यी ज्यी है। जीएसटी री नुवी रेट ईं महीना री 22 तारीख ऊं लागू व्हेला।