मुख्यमंत्री भजनलाल शर्मा थावर ने जयपुर जिला रा गोविंदगढ़ अर सीकर जिला रा सरगोठ, रींगस, पलसाना अर बाजौर मांय जनसभावां ने सम्बोधित कीनी। सरगोठ री सभा मांय श्री शर्मा कह्यो के सरकार जनता ऊं करी ज्या सगळा वायदा पूरा करण री लगातार कोशिश कर रही है। मुख्यमंत्री कह्यो के साल 2027 तांई काश्तकारां ने पाणत सारू दिन मांय ई बिजली मुहैया करा दी जावेला। इण ऊं पैली मुख्यमंत्री जयपुर कने आमेर मांय राख्यी ज्या एक कार्यक्रम मांय कह्यो के सरकार हर हलका रो विकास करणो तैय कीनो है। मुख्यमंत्री थावर शेखावाटी हलका रो तीन दिन रो दौरो सरू कीनो। वां रो दीतवार ने झुंझुनूं रा सर्किट हाउस मांय जनसुणवाई रो कार्यक्रम है। ईं ईं सागे ई वे पिलानी मांय यमुना नदी रा पाणी ऊं जुड़्या करार री विगतवार प्रोजेक्ट रिपोर्ट सारू बणायी ज्यी भेळी टास्क फोर्स री दूजी मीटिंग री सदारत करेला। ध्यानजोग है के यमुना जल समझौता रा पहला दौर मांय ताजेवाला हैड ऊं राज्य मांय पाणी लावण बाबत् पाणी रा बहाव री प्रणाली सारू भेळी डीपीआर बणावण माथे एक राय बणी है। राजस्थान अर हरियाणा रा अहलकारां री दूजी मीटिंग 25 अप्रैल ने हिसार मांय व्हेवणो तैय करी ज्यो है। इण ऊं पैली जिला रा प्रभारी मंत्री अविनाश गहलोत थावर झुंझुनूं पूग र मुख्यमंत्री रा दौरा री तैयारियां रो जायजो लीनो।