भारत, पाकिस्तान ऊं हर भांत री चीजां मंगावण माथे तुरत रोक लगा दीनी है। विदेश व्यापार महानिदेशालय ईं बाबत् अधिसूचना जारी कर दीनी है। पहलगाम आतंकी हमला पाछे भारत, पाकिस्तान सागे हर भांत री डाक अर पार्सल री आवाजाही ई निलंबित कर दीनी है। संचार मंत्रालय रे मुजब सरकार हवाई अर जम़ीनी गेला ऊं डाक अर पार्सल री आवण-जावण निलंबित करण रो फैसलो कीनो है। ईं बीचे राज्य मांय ई हिफ़ाज़त ने ध्यान राखता थकां पुलिस पूरी तरह चौकस है। पुलिस गैर-कानूनी तरीका ऊं रह रह्या बंगलादेशियां री धरपकड़ सारु लगातार काम कर रही है। डीग मांय पुलिस री 17 खास टीमां ढ़ाबां, ईंट-भट्टां अर होटलां मांय जांच कर रही है। झुंंझुनू रा एस.पी. ई कच्ची बस्तियां मांय रेहवण वाळां रा कागज़ात री जांच करण रा हुकम दीना है।