भारतीय जनता पार्टी रा राष्ट्रीय अध्यक्ष अर केंद्रीय स्वास्थ्य मंत्री जे.पी. नड्डा थावर ने जयपुर पधार्या। वे कह्यो के प्रधानमंत्री नरेन्द्र मोदी री अगुवाई वाळी केन्द्र सरकार लारला दस साल मांय काम करण री संस्कृति मांय बदलाव कीनो है। नड्डा कह्यो के सरकार सगळां री समुचित स्वास्थ्य देखभाल माथे खास ध्यान दे रही है।श्री नड्डा महिला सशक्तिकरण सम्मेलन मांय मुख्यमंत्री भजनलाल शर्मा सागे लाडो प्रोत्साहन योजना री सरूआत कीनी। वे 32 हजार 755 टाबरियां समेत न्यारी-न्यारी योजनावां मांय महिलावां अर टाबरियां ने मदद री रकम भेजी। 17 हजार टाबरियां ने वजी़फा अर 19 हजार ऊं बत्ती छात्रावां री फीस री रकम सीधी वां रा बैंक खातां मांय भेजी। ं एक हजार 800 महिलावां ने लखपति दीदी योजना रो फायदो दियो ज्यो। श्री नड्डा राजस्थान पुलिस री कालिका पेट्रोलिंग यूनिट री डोढ़ सौ कर्मचारियां ने ई रवाना कीनी। कार्यक्रम मांय केन्द्रीय मंत्री गजेन्द्र सिंह शेखावत, भागीरथ चौधरी अर राज्य रा चिकित्सा मंत्री गजेन्द्र सिंह खींवसर ई मौजूद रह्या। ईं पाछे वे जवाहर सर्किल कने तिरंगा यात्रा मांय शामिल व्ह्या। ईं दौरान मानव श्रृंखला बणा र वां रो स्वागत करी ज्यो। भाजपा रा राष्ट्रीय अध्यक्ष अहिल्या बाई ने याद करता थकां कह्यो के वे मोटी समाज सुधारक ही ,जो महिलावां ने आगे बधावण सारु ऐतिहासिक काम कीना। इण ऊं पैली श्री नड्डा मालवीय नेशनल इंस्टीट्यूट ऑफ टेक्नोलॉजी मांय स्वामी विवेकानन्द री मूरत माथे सिरधा रा फूल चढ़ा र वां ने याद कीना। इण ऊं पैली जयपुर हवाई अड्डा रे बाहर कार्यकर्तावां ने सम्बोधित करता थकां श्री नड्डा कह्यो के ऑपरेशन सिन्दूर अर एयर स्ट्राइक साबित कर दीनो है के गर कोई म्हाणी ओर निजर उठावेला तो वां ने घर मांय घुस र जवाब दियो जावेला। श्री नड्डा स्वास्थ्य विभाग री समीक्षा बैठक ले रह्या है। मुख्यमंत्री रा रहवास माथे चाल रही मीटिंग मांय मुख्यमंत्री भजन लाल शर्मा अर चिकित्सा मंत्री गजेन्द्र सिंह खींवसर समेत केई आला अहलकार ई मौजूद है।