भारतीय जनता पार्टी रा राष्ट्रीय अध्यक्ष अर स्वास्थ्य मंत्री जगत प्रकाश नड्डा रो शनिवार ने एक दिन रा दौरा माथे जयपुर आवण रो कार्यक्रम है। श्री नड्डा राजस्थान इंटरनेशनल सेंटर मांय होवण वाळा सरकारी कार्यक्रम मांय हिस्सो लेवेला। इण मांय न्यारी-न्यारी योजनावां रे तैत महिलावां अर बालिकावां ने रकम हस्तांतरित करी जाएला। साथे ई न्यारा-न्यारा विकास कामां रो लोकार्पण अर शिलान्यास ई कर्यो जाएला। इण रे पछे वे अहिल्याबाई होल्कर री 300वीं जयंती रे मौके होवण वाळा जळसा मांय हिस्सो लेवेला। कार्यक्रम मांय अहिल्या बाई होल्कर माथे नाटक खेल्यो जाएला अर संगोष्ठी व्हेला। कार्यक्रम मांय राज्य सरकार रा मंत्री, विधायक अर जननुमाइंदा ई हिस्सो लेवेला। भाजपा प्रदेश अध्यक्ष मदन राठौड, प्रभारी राधामोहन अग्रवाल अर दूजा नेतावां शुक्रवार ने आयोजन थल रो दौरो करने तैयारियां रो जायजो लियो। दोपहरां पछे श्री नड्डा पार्टी रा ठावा अहलकारां रे साथे मीटिंग करेला, जिण मांय संगठन ऊं जुड्या न्यारा-न्यारा बूता माथे समीक्षा करी जाएला।