प्रधानमंत्री नरेन्द्र मोदी बुधवार ने कल्याण केन्द्रित विकास रा प्रति सरकार री अटूट प्रतिबद्धता जताई। वे श्रम अर रोज़गार मंत्री डॉ. मनसुख मंडाविया कानी ऊं करी ज्यी एक सोशल मीडिया पोस्ट माथे प्रतिक्रिया दे रह्या हा। श्री मोदी मांड्यो के इण ऊं जनता रा भला री न्यारी-न्यारी योजनावां रो फायदो देश रा हर रेहवासी तांई पूगेला। अंतर्राष्ट्रीय श्रम संगठन रे मुजब भारत मांय सामाजिक सुरक्षा कवरेज साल 2015 रा 19 फीसदी ऊं बध र साल 2025 मांय 64 दशमलव 3 फीसदी व्हे ग्यो है। केन्द्र मांय प्रधानमंत्री नरेन्द्र मोदी री अगुवाई वाळी एनडीए सरकार रा ग्यारह साल पूरा व्हेवण रा सिलसिला मांय भारतीय जनता पार्टी री ओर ऊं न्यारा-न्यारा कार्यक्रम राख्या जा रह्या है। प्रदेश मांय ई केई मंत्री प्रेस कॉन्फ्रेन्स कर र केन्द्र सरकार री उपलब्धियां री जाणकारी दे रह्या है। बुधवार ने जोधपुर मांय केन्द्रीय मंत्री गजेन्द्र सिंह शेखावत अर उपमुख्यमंत्री डॉ. प्रेमचंद बैरवा खबरनवीसां सागे बातचीत कीनी। श्री शेखावत कह्यो के प्रदेश रा किसान ई प्रधानमंत्री कृषि सिंचाई योजना रो फायदो उठा रह्या है। केन्द्रीय मंत्री भूपेन्द्र यादव अलवर मांय प्रेस वार्ता कर र केन्द्र सरकार री योजनावां री जाणकारी दीनी। वे कह्यो के केन्द्र सरकार संकल्प से सिद्धी रो लक्ष्य हासिल कीनो है। लारला 11 साल मांय देश रा हर तबका रा लोगां री ज़िन्दगी मांय सुधार आयो है। भाजपा रा प्रदेश प्रभारी डॉ. राधा मोहनदास अग्रवाल कोटा मांय कह्यो के मोदी सरकार कानी ऊं चलायी जा रही जनता रा भला री योजनावां अर नीतियां रे कारण देश मांय करीब 17 करोड़ लोग गरीबी री लकीर ऊं ऊंचा उठ्या है। ऊर्जा मंत्री हीरालाल नागर पाली मांय संकल्प से सिद्धि तक मुद्दा माथे राख्यी ज्यी कार्यशाला मांय शिरकत कीनी। ईं दौरान सरकार कानी ऊं चलायी जा रही जनता रा भला री योजनावां री प्रदर्शनी भी ई लगायी ज्यी। उद्योग अर वाणिज्य मंत्री कर्नल राज्यवर्द्धन राठौड़ बीकानेर अर केन्द्रीय मंत्री भूपेन्द्र यादव अलवर मांय प्रेस वार्ता कर र केन्द्र सरकार री न्यारी-न्यारी योजनावां री जाणकारी दीनी।