प्रधानमंत्री नरेन्द्र मोदी रक्षा हलका मांय लारला ग्यारह साल मांय भारत री अभूतपूर्व प्रगति री सराहवणा कीनी है। सोशल मीडिया पोस्ट मांय श्री मोदी मांड्यो के इण ऊं खुद रे पाण ऊबा व्हेवण अर आधुनिकीकरण ने मजबूती मिली है।
प्रधानमंत्री कह्यो के देश विश्व स्तर री खेल महाशक्ति बणबा ओड़ी बढ़ रह्यो है, जो खेलां ऊं जुड़्या बुनियादी ढांचा ने मजबूत बणावण ऊं संभव व्हे सक्यो। केंद्रीय खेल मंत्री डॉ. मनसुख मांडविया रो लेख साझा करता थकां प्रधानमंत्री कह्यो के देश मांय खेलां रा बुनियादी ढांचा रो लगातार विकास कर्यो जा रह्यो है। लेख मांय मांडविया मांड्यो के लारला ग्यारह साल मांय खेलां रा हलका मांय ज़बरदस्त बदलाव आयो है अर युवा कार्यक्रम अर खेल मंत्रालय रो बजट तीन गुणा बध ग्यो।
मुख्यमंत्री भजनलाल शर्मा ई मंगलवार ने जयपुर रा प्रदेश भाजपा कार्यालय मांय 11 वर्ष संकल्प से सिद्धी मुद्दा माथे खबरनवीसां सागे बातचीत कीनी। वे कह्यो के लारला ग्यारह साल बदलाव, बरकत अर गौरव रा रह्या है। श्री शर्मा कह्यो के लारला 11 साल मांय देश रा समावेशी विकास माथे ज़ोर दियो ज्यो। मुख्यमंत्री कह्यो के गरीबां, नौजवानां, अन्नदाता अर नारी शक्ति ने मज़बूत बणावण सारू खास काम करी ज्या। प्रदेश भाजपा मुख्यालय मांय संकल्प से सिद्धी अभियान रा तैत मोदी सरकार री उपलब्धियां री प्रदर्शनी ई लगायी ज्यी है।