प्रधानमंत्री नरेन्द्र मोदी कह्यो है के लारला दस साल मांय सरकार जनता री उम्मीदां ने नुवी उड़ान दीनी है। केन्द्र मांय एनडीए सरकार रा 11 साल अर प्रधानमंत्री रा तौर ऊं श्री मोदी रा तीजा कार्यकाल री पहली वर्षगांठ रे मौके सोमवार ने सोशल मीडिया पोस्ट मांय वे देश री विकास यात्रा मांय भेळी कामयाबी माथे नाज़ जतायो। ईं मौके भारतीय जनता पार्टी सोमवार ने पूरा देश मांय जनसम्पर्क अभियान सरू कीनो। संकल्प से सिद्धि प्रचार अभियान रा तैत जनता सागे बातचीत कर र वां ने सरकार री उपलब्धियां री जाणकारी दी जा रही है। केंद्रीय मंत्री अर भारतीय जनता पार्टी रा राष्ट्रीय अध्यक्ष जगत प्रकाश नड्डा प्रधानमंत्री नरेंद्र मोदी री अगुवाई वाळी सरकार ने भ्रष्टाचार मुक्त अर जवाबदेह शासन देवण वाळी बतायी। वे कह्यो के सरकार देश री सियासी संस्कृति ने बदल दीनी। मोदी सरकार रा 11 साल पूरा व्हेवण रे मौके नई दिल्ली मांय खबरनवीसां सागे बातचीत करता थकां श्री नड्डा कह्यो के ईं दौरान साफगोई रो नुवो मानक बणायी ज्यो।
भाजपा रा अध्यक्ष कह्यो के लारला दस साल मांय सरकार अनुसूचित जाति, जनजाति अर अन्य पिछड़ा वर्ग समेत समाज रा सगळा तबकां सारू काम कीनो है। श्री नड्डा कह्यो के सरकार महिलावां माथे खास ध्यान देता थकां विकास ने बधावो दीनो है।
प्रधानमंत्री नरेन्द्र मोदी सगळां ऊं नमो एप माथे भारत री लारला 11 साल री विकास यात्रा ऊं जुड़्या सर्वे मांय शिरकत करण री अरज कीनी है। सोशल मीडिया पोस्ट मांय श्री मोदी एक पोर्टल रो लिंक ई साझा कीनो, जिण रे मार्फत कोई ई जन मन सर्वेक्षण मांय शिरकत कर सके है।