प्रधानमंत्री नरेन्द्र मोदी देश रा काश्तकारां रा कल्याण खातर सरकार री प्रतिबद्धता दोहराई। एनडीए सरकार रा केन्द्र मांय ग्यारह बरस पूरा होबा रे मौके श्री मोदी कह्या के या सरकार खातर गौरव री बात है। के उण रा इण कार्यकाल मांय देश रा मेहनती कातकारां री सेवा करी गयी। श्री मोदी लारला ग्यारह बरस मांय किसानां रा विकास खातर करी गयी कोशिशां रा बारा मांय बताया। जिण सूं खेतीबाड़ी रा हलका मांय बढो फेर बदल व्ह्यो। श्री मोदी कह्या के काश्तकारां रा कल्याण खातर सरकार री कोशिशां आवता टेम मांय भी जोर-शोर ऊं जारी रहवेला। देश मांय सेवा, सुशासन अर गरीब कल्याण रा सिद्धांतां सूं प्रेरित व्हे र एक दशक मांय महत्तव जोग बदलाव व्ह्यो है। लारला 11 बरसा मांय, भारत कृषि हलका मांय घणी तरक्की करी है। इण दौरान कृषि मांय सरकार रो बजट आवंटन करीब पांच गुना बढ़्यो है। बरस 2013-14 मांय यो 28 हज़ार करोड़ रुप्यां हो जो बरस 2024-25 मांय एक लाख 37 हजार करोड़ रूप्या व्हे ग्यो। प्रधानमंत्री किसान योजना रे तैत तीन लाख 70 हजार करोड़ रूप्या सूं बत्ती री धनराशि 11 करोड़ काश्तकारां तांई सीधी पूगी है। काश्तकारां री माली सुरक्षा मांय भी सुधार व्ह्यो है। इण बरसा मांय गेहूं, धान, दलहन अर तिलहन भांत री खास फ़सलां रा कम ऊं कम समर्थन मूल्य मांय भारी बढ़ोतरी व्ही है। सोलर पंपां खातर पीएम-कुसुम अर प्राकृतिक खेती मिशन जेडी योजनावां सूं कृषि हलका मांय मजबूती अर स्थिरता ने बढ़ावो मिल्यो है। दूध उत्पादन मांय 63…. सूं बत्ती री बधवार व्ही है जिण सूं भारत दुनिया रो शीर्ष डेयरी उत्पादक देश बण ग्यो है। प्रदेश मांय भी काश्तकारां ने एनडीए सरकार री किसान कल्याणकारी योजनावां रो भरपूर फायदो मिल्यो है।