प्रदेश रा पूर्वी अर दक्षिणी खेतरां समेत न्यारा-न्यारा हलकां मांय मूसलाधार बिरखा रो दौर बण्योडो है। कोटा संभाग रे जिलां मांय लारले तीन दिनां सूं जारी भारी बरसात सूं जनजीवन अस्त-व्यस्त व्हे ग्यो है। राजधानी जयपुर साथे दौसा, अलवर, सवाईमाधोपुर, सीकर अर टोंक जिलां मांय भी तेज बिरखा रो सिलसिलो बण्योडो है। मौसम महकमा रे मुजब लारला चौबीस घंटा मांय सब सूं बत्ती 29 सेंटीमीटर बिरखा दौसा मांय दर्ज व्ही। वठी ने करौली रे सपोटरा अर जयपुर रे चौमूं मांय 17-17, गंगापुर, जमवारामगढ मांय 13-13 अर मकराना अर नावां मांय 11-11 सेंटीमीटर पाणी बरस्यो। कोटा मांय लारला तीन दिनां सूं जारी लगोतार बिरखा रे पाछे रविवार ने धूप निकळने सूं लोगां ने थोड़ी राहत मिली। म्हाणा खबरनवीस बतायो के कोटा बैराज रा दो गेट खोल र बेसी पाणी री निकासी करी जा री है। सवाईमाधोपुर मांय अतिवृष्टि रे पाछे जलभराव वाळा इळाकां मांय राहत अर बचाव काम जारी है। वठी ने एनडीआरएफ अर एसडीआरएफ साथे सेना री मदद ली जा री है। जिला कलेक्टर कानाराम आकाशवाणी ने बतायो कि प्रभावित लोगां रे खाणे अर रेहणे री व्यवस्था करीजी है। जिला कलेक्टर लोगां सूं एहतियात बरतणे री अरज करी है। शेखावाटी खेतर रा जिला मांय भी बिरखा रो दौर बण्योडो है। चोखी बिरखा सूं झुन्झुनू रा उदयपुरवाटी रो कोट बांध दो साल पाछे ओवर फ्लो हो ग्यो। चूरू मांय दीतवार ने एक घंटे सूं बत्ती बखत तांई व्ही मूसलाधारा बरसात सूं नीचला हलकां मांय पाणी भर ग्यो। इण सूं केई गेला रूक ग्या। माउंट आबू मांय हो री झमाझम बरसात सूं घाटियां मांय कोहरो छा ग्यो। भरतपुर, डीग अर आसे-पासे रे हलका मांय बरसात रो दौर अजे भी जारी है। बयाना री गंभीर नदी मांय पाणी आ जाणे सूं खेतर अलर्ट घोषित कर्यो है। वठे लोगां सूं जलभराव रा खेतर सूं दूरी बणाये राखणे री अरज करी जा री है। वठी ने राजधानी जयपुर मांय बीत्या दो-तीन दिनां सूं जारी बिरखा ने देखता व्ह्या जिला कलेक्टर कल अर परसों स्कूलां मांय पढेसरियां रो छुट्टी रो ऐलाण कर्यो है। बिरखा री आशंका रे चालता एहतियातन शहर रा किशनबाग अर स्वर्ण जयंती पार्क समेत कुछेक पार्कां मांय लोगां रो प्रवेश बंद कर्यो गयो है। जिला प्रशासन आमेर महल जावण वाळा गेला माथे फिसलन ने देखता व्ह्या हाथी सवारी माथे भी रोक लगा दी है। भीलवाड़ा अर नागौर मांय भी स्कूलां मांय काले री छुट्टी राखीज्यी। इण बीचे, मौसम महकमो दीतवार ने जयपुर, भरतपुर, बीकानेर अर अजमेर सांभग अर शेखवाटी खेतर मांय कुछेक ठोडां माथे भारी सूं और भारी बिरखा री आस जताई है। आवता तीन-चार दिनां बरसात री आ ई स्थिति बण्योडी रेहणे री आस है।