प्रदेश रा तीस ज़िला मांय थावर ने बिरखा रो अलर्ट है। मौसम मेहकमां मुजब इण मांय कोटा, बूंदी, बारां अर झालावाड़ ज़िला मांय भारी बिरखा रो ऑरेंज अलर्ट है। वठे ई बाकी रा ज़िला मांय हलका ऊं मझला दर्जा री बिरखा रो येलो अलर्ट बतायी ज्यो है। भरतपुर अर जयपुर संभाग अर शेखावाटी हलका रा कुछ हलकां मांय आवता 2-3 दिन मझला ऊं तेज़ अर कठेई-कठेई भारी बिरखा व्हे सके है। उठिने, दिखणाद राजस्थान रा कुछ हलकां मांय काले ऊं भारी बिरखा री गतिविधियां मांय कमी रा आसार है। ई बीच, थावर सवाईमाधोपुर, पाली सीकर अर झुंझुनूं समेत आरे-सारे रा हलका मांय चौखी बिरखा व्ही। म्हाणा सवाईमाधोपुर खबरनवीस बतायो के ज़िला मांय बिरखा रे कारण केई ठौड़ां पाणी भरीजण रा हालात बण्योड़ा है। ज़िला कलेक्टर लोगां ऊं सावचेती बरतण री अरज करी है। राज्य मांय केई ठौड़ां चौखो पाणी बरसण ऊं छोटा-मोटा बंधा मांय पाणी री आवण बण्योड़ी है। प्रदेश रा 692 बंधा मांय कुल भराव बूता रो 55 फीसदी पाणी आ चुक्यो है। 56 बंधा लबालब है। वठे ई 412 आंशिक भरीज ग्या है। मॉनसून आवण रे साथै ई प्रदेश मांय मोटा थर माथे पौधरोपण कर्यो जावे। हरियालो राजस्थान अभियान रे तैत न्यारी-न्यारी संस्थावां अर सामाजिक संगठन ई इण मांय सक्रिय भागीदारी निभा रिया है। ईं कड़ी मांय जंगळात मेहकमां कानी ऊं रियायती रेट माथे पौधा मुहैया कराया जावे।