प्रदेश रा घणी बिरखा वाळा हलकां रो ज़िलां रा प्रभारी मंत्री अर सचिव दौरो कर र हालात रो जायजो ले रह्या है। ईं सागे ई संबंधित अहलकारां सागे मीटिंग कर र जनता ने बेगी साता देवण सारू हुकम दिया ज्या है। सलूम्बर मांय व्हे रही लगातार बिरखा रे कारण भर्या पाणी अर इण ऊं उपजा हालात रो जायजो लेवण सारू ज़िला रा प्रभारी मंत्री हेमंत मीणा वठे रो दौरो कीनो। वे सेमारी हलका मांय किसानां ऊं फसल खराबा री जाणकारी लीनी। श्री मीणा जनता ऊं तेज़ बहाव वाळा हलका ऊं दूर रेहवण री अपील कीनी है। करौली मांय प्रभारी मंत्री जवाहर सिंह बेढम अर प्रभारी सचिव अनुपमा जोरवाल घणी बिरखा रे कारण उपजा हालात री जाणकारी ले र जरूरतमंद लोगां ने तुरत मदद देवण रा हुकम दीना। संसदीय कार्य मंत्री जोगाराम पटेल अर जोधपुर रा ज़िला प्रभारी मंत्री मदन दिलावर थावर ने ज़िला रा लूणी मांय घणी बिरखा रे कारण व्ह्या नुकसाण रो जायजो लेवण सारू अहलकारां सागे मीटिंग कीनी। मीटिंग मांय वे कृषि अर पंचायतीराज विभाग रा अहलकारां सागे हलका मांय व्ह्सा फसल खराबा अर जनता री परेशानियां री जाणकारी लीनी। वे टूटी स्कूलां, अस्पतालां अर आंगनबाड़ी केन्द्रां री मरम्मत रा प्रस्ताव बेगा तैयार करण रा हुकम दीना। श्री पटेल फसल खराबा री गिरदावरी तुरत अर साफगोई सागे करण रा हुकम दीना। मीटिंग मांय श्री दिलावर कह्यो के गिरदावरी री प्रक्रिया बेगी पूरी कर र जनता ने साता देवण माथे सरकार रो खास ध्यान है। डीग, सवाईमाधोपुर, करौली अर हनुमानगढ़ मांय ई ज़िला रा प्रभारी सचिव दौरो कर र राहत रा कामां रो जायजो लीनो।