प्रदेश रा गैर-सरकारी अस्पतालां मांय आरजीएचएस सेवा तुरत सरू व्हे ग्यी है। चिकित्सा अर स्वास्थ्य विभाग री प्रमुख सचिव अर आरएसएचएए रा मुख्य कार्यकारी अधिकारी री ईलाज रा हलका रा नुमाइंदा सागे मीटिंग पाछे आरजीएचएस रा तैत बिना नकदी मुहैया करायी जावण वाळी सेवावां पैली री भांत ओजू सरू व्हे ग्यी है। ध्यानजोग है के गैर-सरकारी अस्पताल 25 अगस्त ऊं आ सेवा बंद कर दीरीजी ही, जिण ऊं राज्य रा लाखां कर्मचारियां अर वां रा पिरवार वाळां ने गैर-सरकारी अस्पतालां मांय ईलाज नी मिल रह्यो हो। विभाग री प्रमुख शासन सचिव गायत्री राठौड़ बतायो के बुधवार ने संवारे आरजीएचएस ऊं जुड्या अस्पतालां रा नुमाइंदा सागे व्ही चर्चा पाछे अ सगळा अस्पताल आरजीएचएस रा तैत सेवा सरू करण सारू राजी व्हे ग्या। राजस्थान स्टेट हेल्थ इंश्योरेंस एजेंसी रा मुख्य कार्यकारी अधिकारी हरजीलाल अटल बतायो के गैर-सरकारी अस्पतालां रा बिलां री बाकियात रा चुकारा रो काम तेज़ कर्यो जावेला। ईं सागे ई सीजीएचएस री भांत आरजीएचएस री रेट मांय बदलाव सारू ई जांच करायी जावेला। श्री अटल बतायो के योजना रा न्यारा-न्यारा नियमां मांय जरूरी सुधार सारू संयुक्त समिति बणा दीरीजी है जिण री राय रे मुजब योजना मांय नीतिगत बदलाव कर्या जावेला।