प्रदेश रा कुछ हलकां मांय आवता तीन-चार दिन तांई भारी अर कठे-कठे घणी भारी बारिश व्हेवण रा आसार है। मौसम विभाग सोमवार ने केई ज़िलां मांय बरसात रो ऑरेंज अर येलो अलर्ट जारी कीनो है। ईं बीचे लारला चौबीस घंटां मांय केई ठौड़ां हल्की ऊं मझला दर्जा री बिरखा व्ही, जद के कठे-कठे भारी ऊं घरी भारी बिरखा व्ही। सिरोही ज़िला रा केर मांय 19 सेंटीमीटर पाणी बरस्यो। नागौर मांय 17, उदयपुर ज़िला रा खेरवाड़ा अर जालौर मांय 16-16 सेंटीमीटर मेह बरस्यो। सीकर, राजसमंद, डूंगरपुर अर हनुमानगढ़ मांय 10-10 सेंटीमीटर ऊं बत्ती बिरखा व्ही। सलूम्बर अर सवाईमाधोपुर ज़िला रा नदी-नाळां मांय पाणी उफण रह्यो है। केई ठौड़ां सड़कां ने नुकसाण व्ह्यो है। सवाईमाधोपुर रा ज़िला कलेक्टर कानाराम बतायो के बारिश रो दौर मंदो पड्यां पाछे अब हालात सुधरण लाग्या है। करौली ज़िला रा सपोटरा हलका रो काठड़ा चार ऊं मेर पाणी ऊं घिर ग्यो है। अजमेर शहर रा रिहायशी हलका मांय भर्यो पाणी पम्प रे जरिये निकाळ्यो जा रह्यो है। ज़िला रा सगळा छोटा-मोटा तळाव भर ग्या है अर वरूण सागर माथे रपट चाल रही है। हनुमानगढ़ मांय दो दिन ऊं रूक-रूक र मेह बरस रह्यो है। नीचला हलकां मांय पाणी भर जावण ऊं आवण-जावण माथे असर पड़ रह्यो है। डूंगरपुर ज़िला रो मेवाड़ा बंधो ई छलक ग्यो है। ज़िला रा सोम-कमला-अम्बा बंधा रा सगळा 9 दरूजा खोल र बत्तो पाणी निकाळ्यो जा रह्यो है। पाली ज़िला रा जवाई बंधा मांय लगातार पाणी आ रह्यो है। चूरू मांय लारला चौबीस घंटां मांय व्ही झमाझम बिरखा पाछे न्यारी-न्यारी ठौड़ां पाणी भर ग्यो है। तेज़ बारिश री शंका ने ध्यान राखता थकां कोटा विश्वविद्यालय काल लिया जावण वाळा सगळा इम्तिहान टाळ दीना है।