प्रदेश मांय हाल तांई सामान्य ऊं डोढ़ा ऊं बत्तो मेह बरस ग्यो है। कुछ जिलां रे अलावा घणखर ज़िला मांय सामान्य ऊं बत्ती बिरखा व्ही है। ऊगणी हलका मांय सामान्य ऊं करीब 38 फीसदी जद के आतूणी हलका मांय सामान्य ऊं 75 फीसदी बत्तो पाणी बरस्यो है। मौसम विभाग रे मुजब दौसा जिला मांय हाल तांई सब ऊं बत्ती 1 हजार 148 मिलीमीटर बिरखा व्ही है। सवाईमाधोपुर मांय एक हजार 43,करौली मांय करीब एक हजार अर टोंक मांय 972 मिलीमीटर बिरखा दर्ज करी ज्यी है। आतूणी हलका रा जैसलमेर ज़िला मांय सामान्य ऊं 162 फीसदी पाणी बरस्यो। दूजी कानी सिरोही, झालावाड़ अर डूंगरपुर ज़िला मांय औसत ऊं थोड़ो कम मेह बरस्यो है। प्रदेश रा न्यारा-न्यारा हलकां मांय व्हे रही बिरखा ऊं नदी-नाळां मांय लगातार पाणी आ रह्यो है। सवाईमाधोपुर ज़िला मांय आज दोपहर पाछे करीब आधा घंटा तांई बिरखा व्ही। डूंगरपुर ज़िला मांय लारला तीन-चार दिन व्हे रही बिरखा ऊं तळावां अर बांधा मांय लगातार पाणी आ रह्यो है। सिरोही ज़िला रा आबूरोड़ हलका मांय एक जणो रपट पार करती बगत बरसाती नाळा मांय बह ग्यो। सिरोही ज़िला री मीरपुर नदी मांय पाणी मांय फंसी बकरियां ने गांव वाळा मानव श्रृंखला बणा र बचायी। ईं बीचे टोंक ज़िला रा बीसलपुर बंधा मांय लगातार पाणी आवण ऊं इण मांय पाणी रो लेवल 314 दशमलव 40 आर एल मीटर व्हे ग्यो है।