प्रदेश मांय वरिष्ठ नागरिक तीर्थ यात्रा योजना रा तैत ईं दफा 56 हजार बुजुर्गां ने तीरथ करायो जावेला। 50 हजार बुजुर्गां ने वातानुकूलित रेलगाड़ी ऊं जदके छह हजार ने हवाई यात्रा कराई जावेला। देवस्थान मंत्री जोराराम कुमावत शुक्रवार ने जयपुर मांय देवस्थान विभाग री वेबसाइट माथे ऑनलाइन तरीका ऊं अर्जी देवण रा काम री सरूआत कीनी। पात्र बुजुर्ग 10 अगस्त तांई अर्जी दे सके है। श्री कुमावत बतायो के ऑनलाइन अर्जी मिल्यां पाछे जिला स्तर री समिति पात्र लोगां रो चयन करेला। तीरथ माथे जावण री मर्जी राखण वाळा जातरूआं री वैटिंग लिस्ट ई बणायी जावेला। ईं दफा जातरूआं ने 40 ठोड़ां री तीर्थ यात्रा कराई जावेला। खबरनवीसां सागे बातचीत करता थकां श्री कुमावत कह्यो के देवस्थान विभाग रा तैत आवण वाळां मिन्दरां सागे ई सरकार दूजा मिन्दरां मांय ई प्रशासनिक अर कानून व्यवस्था बणायी राखण मांय मदद कर रही है।