प्रदेश मांय लारला तीन-चार दिन ऊं चाल रह्या आंधी-बारिश रा दौर रे कारण पारो उतरण ऊं गर्मी ऊं साता मिली है। घणखर ठौड़ां दिन अर रात री बगत तापमान सामान्य ऊं 5 ऊं 8 डिग्री सेल्सियस नीचे चाल रह्यो है। मौसम रा जाणकारां रे मुजब मई महीना रा पहला पखवाड़ा मांय राज्य रा घणखर हलका मांय घणी गर्मी नी पडे़ला। मंगलवार ने जैसलमेर, बाड़मेर, जोधपुर, नागौर, बूंदी, अलवर अर श्रीगंगानगर समेत केई ज़िलां मांय ज़ोरदार बायरो बाजण अर आंधी सागे कठे-कठे हल्की बारिश व्हेवण रा समाचार है। बालोतरा मांय कुछ देर तांई ज़ोरदार मेह बरस्यो। ज़िला रा पाटोदी, कल्याणपुर अर पचपदरा मांय ई चोखी बरसात व्ही। म्हाणा श्रीगंगानगर खबरनवीस बतायो के ज़िला रा पदमपुर अर रायसिंह नगर मांय तेज़ बिरखा व्ही।डीग मांय हल्की बिरखा व्ही। प्रदेश रा केई ज़िलां मांय बादळा मण्ड्या रह्या। ईं बीचे उदयपुर मांय काल रात आया अंधड़ अर तेज़ बारिश ऊं शहर मांय केई ठौड़ां बिजली रा खम्भा पड़ ग्या अर रूंखड़ा उखड़ ग्या। मौसम केंद्र जयपुर आवता एक सप्ताह तांई आंधी-बारिश रो दौर चालतो रेहवण रा आसार जताया है। केंद्र रा निदेशक राधेश्याम शर्मा बतायो के जोधपुर, कोटा अर उदयपुर संभाग मांय आज अर काल तेज़ आंधी चालण अर बिरखा सागे बीजळी पड़बा री शंका है।