प्रदेश मांय मॉनसून री रंगत बण्योडी है। शुक्रवार ने ई दिखणाद अर अगुणी जिलां मांय घणखरी ठोडां बिरखा री गतिविधियां दर्ज करीजी। मौसम महकमा मुजब लारला चौबीस घंटा मांय सब ऊं बत्ती 12 सेंटीमीटर पाणी बाँसवाड़ा रा सल्लोपाट मांय बरस्यो। महकमो 28 जिलां सारू शुक्रवार ने बिरखा रो अलर्ट जारी कर्यो है। बांसवाड़ा मांय रेड अलर्ट, जदके बारां, भीलवाड़ा, बूंदी, चित्तौड़गढ़, डूंगरपुर, झालावाड़, सिरोही, कोटा, उदयपुर, प्रतापगढ़, राजसमंद, सलूम्बर अर सवाईमाधोपुर सारू बिरखा रो ऑरेंज अलर्ट दीरी ज्यो है। ईं बीचे प्रदेश रा घणखरां हलकां मांय व्हे री झमाझम बिरखा ऊं नदी-नाळां उफाण माथे है। केई बंधा ओवर फ्लो चाले। वठे ई केई बंधा आपरी भराव खमता कने आय गया है। म्हारा पाली खबरनवीस बतायो के आथूणी राजस्थान रा सब ऊं मोटा जवाई बांध आपरी पूरी खमता रे नजदीक पूग ग्यो है। वठे बंधा रा गेट खोलण ने लेर प्रशासन विचार करे। बांसवाड़ा रा माही बजाज बंधा रा 16 गेट खोलने बरोबर बत्ती रो पाणी निकाळ्यो जावे। अजमेर मांय बोराज तळाब री बिरखा रे कारण काले टूटी पाल ने ठीक करण रो काम चाले। पाळ टूटण हलका री केई कॉलोणियां मांय पाणी भरीज ग्यो। सर वाळा लोगां ने हिफाजती ठोडां पूगाई ज्या ई। उठी ने दौसा मांय 15 साल ऊं सूखी पड़ी बाणगंगा नदी मांय पाणी आवण माथे गांव वाळा रीत मुजब उण रो स्वागत करयो।