प्रदेश मांय मंगलवार ने केई ठौड़ां तेज गर्मी अर उमस बीचे दोपहरां पाछे ज़ोरदार बायरो बाजण सागे बारिश व्ही। कठे-कठे ओळा पड़बा रा ई समाचार है। राजधानी जयपुर मांय ई बादळां री आमद-रफ्त रही। हनुमानगढ़ मांय अंधड़ पाछे छांटो-छिड़को व्ह्यो। भरतपुर मांय व्ही बिरखा पाछे मौसम खुशगवार व्हे ग्यो। म्हाणा भीलवाड़ा खबरनवीस बतायो के ज़िला रा गांवाई हलकां मांय बिरखा व्हेवण सागे ओळा ई पड़्या। मौसम विभाग बुधवार ने राज्य रा 21 ज़िलां मांय आंधी चालण अर बारिश व्हेवण सारू चेतायो है। 15 मई ऊं राज्य रा आतूणी हलकां मांय लू बाजण सारू चेतायी ज्यो है। ईं दौरान पारो 44 ऊं 45 डिग्री सेल्सियस तांई पूगण रा आसार है। महकमो तावड़ा अर लू ऊं बचबा री राय दीनी है।