प्रदेश मांय जबरदस्त तावड़ो पड़ रह्यो है। उतराद-आतूणी हलका रा सरहदी ज़िला मांय चढ़ता पारा अर लू रे कारण जिन्दगी माथे घणो असर पड़ रह्यो है। श्रीगंगानगर मांय लारला चौबीस घंटां मांय पारो 47 डिग्री सेल्सियस ने पार कर ग्यो। जिला प्रशासन री ओर ऊं सड़कां माथे पाणी रो छिडकाव करायो जा रह्यो है। बीकानेर मांय 46 दशमलव 6 अर चूरू अर जैसलमेर मांय 46 डिग्री सेल्सियस तापमान दर्ज करी ज्यो। बाड़मेर, जैसलमेर, जोधपुर अर भीलवाड़ा समेत न्यारा-न्यारा हलका मांय ई आखा दिन ज़ोरदार तावड़ो पड़्यो। अलवर मांय लारला चौबीस घंटां रे दौरान पारो एक डिग्री चढ़ ग्यो, ज्यीं कारण दिन सागे रात मांय ई लू रो असर रह्यो। वठे रा जिला अस्पताल मांय लारला पांच दिन मांय सूरज री तपिश रे कारण चमड़ी लाल व्हे जावण रा 50 ऊं बत्ता मरीज पूग्या। राजधानी जयपुर समेत राज्य रा ऊगणी हलका मांय ई आखा दिन तेज़ तावड़ो रह्यो। दूजी कानी दौसा अर आरे-सारे रा हलकां मांय दोपहरां पाछे मौसम पलट ग्यो। दौसा शहर मांय कठे-कठे ओळा पड़्या। चित्तोडगढ़ मांय सिंज्यां री पोर तेज़ अंधड़ सागे बिरखा व्ही।