प्रदेश मांय चाल रह्या बिरखा रा दौर बीचे सोमवार ने बाड़मेर मांय आखा दिन ज़ोरदार बायरो बाजण सागे बिरखा व्ही। लारला 24 घंटां मांय कठे-कठे घणी ज़ोरदार बारिश व्ही। सब ऊँ बत्तो 25 सेंटीमीटर पाणी माउंट आबू मांय बरस्यो। तेज बारिश ऊँ सड़कां टूट जावण रे कारण सैलाणियां ने आबूरोड़ ऊँ माउंट आबू जावण ऊँ रोक दिया ज्या है। दूजी कानी सवाईमाधोपुर मांय बारिश मंदी पड़ ग्यी है, हालांकि बीसलपुर बंधा ऊँ बत्तो पाणी निकाळबा रे कारण बनास नदी मांय पाणी रो लेवल बध ग्यो है अर केई गांव जिला मुख्यालय ऊँ कट ग्या है। पाली ज़िला मांय जवाई बंधा ऊँ ई बत्तो पाणी निकाळ्यो जा रह्यो है। बालोतरा री लूणी नदी मांय ई लगातार पाणी आवण ऊँ सांचौर अर जालौर रा गेला बंद व्हे ग्या है। श्रीगंगानगर मांय घग्घर नदी मांय बाढ़ आवण रे कारण उपजा हालात ने ध्यान राखता थकां सूरतगढ़, विजयनगर अर अनूपगढ़ री सगळी स्कूलां अर कॉलेजां मांय सोमवार ने अर काल छुट्टी रो ऐलाण कर दियो ज्यो है। ईं बीचे सोमवार ने जालौर, सिरोही, बाड़मेर जैसलमेर अर आरे-सारे रा ज़िलां मांय ज़ोरदार बायरो बाजण सागे कठे-कठे भारी बारिश व्हे सके है। राज्य रा बाकी हिस्सां मांय कठे-कठे हल्की ऊँ मझला दर्जा री बरसात रा आसार है। मौसम विभाग काल ई जैसलमेर अर बाड़मेर ज़िलां मांय कठे-कठे भारी बारिश री संभावना जताई है। राज्य रा घणखर हलका मांय आवता एक सप्ताह बिरखा मांय कमी रो अनुमान है।