प्रदेश मांय तेज गर्मी रो दौर फेरू सरू व्हे ग्यो है। सात सूं बेसी जिलां मांय दीतवार ने बत्ती ऊं बत्ती तापमान 45 डिग्री सेल्सियस सूं ऊपर दर्ज कर्यो गयो। सब सूं बत्ती 47 दशमलव 4 डिग्री सेल्सियस तापमान श्रीगंगानगर मांय रियो। बीकानेर मांय 46 डिग्री, बाड़मेर मांय 45 दशमलव 9, चूरू मांय 45 दशमलव 6, फलोदी मांय 45 दशमलव 4, जैसलमेर मांय 45 दशमलव 2 अर कोटा मांय 45 डिग्री सेल्सियस तापमान दरज कर्यो गयो। चूरू, भरतपुर, पाली, कोटा अर बारां साथे न्यारा-न्यारा जिलां मांय झुलसा देवण वाळी तेज गर्मी सूं जनजीवन प्रभावित व्हीयो है। दीतवार ने गर्मी रे कारण बाजारां मांय सन्नाटो पसरो निजर आयो। म्हाणा बाड़मेर खबरनवीस बतायो कि ज़िला मांय भीषण गर्मी, लू रा थपेड़ां सूं जनजीवन माथे घणो असर देखण ने मिल रियो है।
मौसम केन्द्र जयपुर रे मुजब दीतवार अर सोमवार ने बीकानेर अर श्रीगंगानगर साथे कुछेक जिलां मांय हीटवेव री स्थिति बणी रेहवेली। तापमान मांय दो डिग्री तांई बधोतरी व्हे सके है। 10 जून तांई कुछेक शहरां मांय बत्ती ऊं बत्ती तापमान 46 डिग्री सेल्सियस या उण सूं भी ऊपर होवण री आस है।