प्रदेश मांय केई ठौड़ां अप्रैल महीना रा पहला सप्ताह मांय ई तेज़ गर्मी पड़बा लाग्यी है। बाड़मेर अर जैसलमेर समेत न्यारी-न्यारी ठौड़ां लारला दो-तीन दिन ऊं लू बाज रही है। म्हाणा बाड़मेर खबरनवीस बतायो के वठे उन्नो बायरो बाजण ऊं जिन्दगी माथे असर पड़ रह्यो है। कोटा, चित्तौड़गढ़ अर जालौर मांय बाज रही गर्म हवा ऊं लोगां ने परेशानी रो सामो करणो पड़ रह्यो है। दिन री बगत धूप री तपिश रे कारण आवाजाही मांय कमी आयी है। झुंझुनूं मांय तपन ऊं बचाव सारु भांत-भांत रा जतन कर्या जा रह्या है। मौसम विभाग रे मुजब आवता दो दिन तेज़ गर्मी ऊं साता मिलण रा आसार नी है। दस अप्रैल ऊं प्रदेश मांय कठे-कठे आंधी चालण अर हल्की बिरखा व्हेवण रा आसार है। ईं बीचे सवाईमाधोपुर री जनता ने उनाळा मांय पाणी मुहैया करावण सारू शहर रा आठ हलका मांय ट्यूबवेल खोद्या जावेला। ईं सारू लगभग 99 लाख रूप्या मंजूर करी ज्या है।