प्रदेश मांय कठे-कठे भारी बारिश अर घणखर हलकां मांय हल्की ऊं मझला दर्जा री बरसात रो दौर चल रह्यो है। मौसम विभाग मंगलवार ने भरतपुर, अजमेर, जोधपुर, बीकानेर अर जयपुर संभाग मांय कठे-कठे भारी ऊं घणी भारी बिरखा व्हेवण रा आसार जताया है। बुधवार ने कोटा, उदयपुर, भरतपुर अर बीकानेर संभाग मांय कठे-कठे भारी बारिश व्हे सके है। राज्य रा ऊगणी हलकां मांय 17 जुलाई ऊं जदके आतूणी हलकां मांय 18 जुलाई ऊं बिरखा रो ज़ोर कम पड़बा री संभावना है। ईं बीचे मंगलवार ने पाली ज़िला रा हेमावास मांय 19 सेंटीमीटर पाणी बरस्यो। तेज़ बरसात रे कारण पाली शहर री केई कॉलोनियां मांय पाणी भर ग्यो, जद के गांवांई हलकां मांय खेतां मांय पाणी भर जावण रा समाचार है। लारला चौबीस घंटां मांय भीलवाड़ा ज़िला रा बिजौलियां मांय सब ऊं बत्तो 18 सेंटीमीटर पाणी बरस्यो। चित्तौडगढ़ ज़िला रा भैंसरोड़गढ़ मांय 17, नागौर ज़िला रा मकराना मांय 14 अर टोंक ज़िला रा निवाई मांय 13 सेंटीमीटर बरसात व्ही। मंडाना, सांभर, नावां अर परबतसर समेत केई ठौड़ां 10-10 सेंटीमीटर ऊं बत्तो मेह बरस्यो। चोखी बिरखा रे पाण राज्य मांय बंधा अर कूड़ा-बावड़ियां करीब 62 फीसदी भर ग्या है। 106 बंधा लबालब भर ग्या है जद के 407 थोड़ा-घणा भर्या है।