प्रदेश मांय आवता तीन-चार दिन कोटा, उदयपुर, भरतपुर, अजमेर अर जयपुर संभाग मांय कठे-कठे भारी ऊं घणी भारी बारिश व्हेवण रा आसार है। मौसम विभाग केई ठोडां मझला ऊं तेज़ दर्जा री बिरखा री संभावना ई जतायी है। जोधपुर अर बीकानेर संभाग रा कुछ हलकां मांय 5 सितम्बर ऊं बारिश ओजू तेज़ व्हेवण रा आसार है। ईं बीचे बुधवार ने ई पाली, सवाईमाधोपुर, करौली, बांसवाड़ा अर राजधानी जयपुर समेत केई ठोडां मेह बरस्यो। कोटा जिला रा कनवास अर आरे-सारे रा हलकां मांय काल ऊं व्हे रही बिरखा ऊं अरू नदी मांय पाणी उफण रह्यो है। म्हाणा खबरनवीस बतायो के कनवास मांय बाढ़ सरीखा हालात ऊं केई गेला बंद व्हे ग्या है। सवाईमाधोपुर अर आरे-सारे रा हलकां मांय बुधवार ने रूक-रूक र मेह बरस्यो। पाली मांय दोपहरां पाछे ज़ोरदार बरसात व्ही। ईं बीचे ज़िला रा हेमावास बंधा मांय पाणी रो रिसाव बंद कर दियो ज्यो है। डूंगरपुर मांय ई झमाझम मेह बरस्यो। सलूम्बर मांय रिमझिम बारिश व्ही। प्रदेश मांय लगातार व्हे रही बिरखा ऊं केई ठोडां पाणी भर ग्यो। प्रशासन अर आपदा प्रबंधन री टीमां हालात माथे नज़र राख रही है। राजधानी जयपुर मांय जिला कलेक्टर जितेन्द्र कुमार सोनी ज़रूरत रा हिसाब ऊं नागरिक सुरक्षा स्वयं सेवकां री तैनाती रा हुकम दीना है। वे एस.डी.ओ., तहसीलदारां अर प्रशासनिक अहलकारां ने मौके पूग र हालात रो जायजो लेवण अर राहत सारू साधनां री उपलब्धता तैय करण बाबत् कह्यो।