प्रदेश मांय आखा तीज अर पीपल पूण्यू रा अबूझ सावा रे मौके बाळाक जोड़ा रा ब्याह री शंका ने ध्यान राखता थकां पुलिस सावचेती बरत रही है। दूसरी ओर पुलिस री ओर ऊं खास अभियान ऑपरेशन लाडली चलायो जा रह्यो है। अतिरिक्त पुलिस महानिदेशक मालिनी अग्रवाल बतायो के पुलिस गांवांई हलकां मांय जनता रा नुमाइन्दां सागे बाळक जोड़ा रा ब्याह रे खिलाफ जाग जगा रही है। राज्य मांय बाळक जोड़ां रा ब्याह रोकण सारु जनता मांय जाग जगावण रो अभियान चलायो जा रह्यो है। पाली मांय सोमवार ने जिला विधिक सेवा प्राधिकरण री ओर ऊं आंगनबाड़ी कार्यकर्तावां ने बाळ-पणा मांय ब्याह रा नुकसाण री जाणकारी दीरीजी। पहले पढाई-फिर विदाई संदेश सागे समझाइश ई करी ज्यी। ईं सागे ई बाल-विवाह मुक्त राजस्थान री सौगंध दिरायी ज्यी। डूंगरपुर मांय चलाया जा रह्या जागरूकता अभियान मांय धर्म गुरूआं री ई मदद ली जा रही है।