प्रदेशभर मांय सेवा पखवाड़ा रे तैत दीतवार ने न्यारी-न्यारी ठौड़ां नमो युवा रन आयोजित करी ज्यी। लोकसभा अध्यक्ष ओम बिरला कोटा मांय उम्मेद सिंह स्टेडियम ऊँ रन ने रवाना कर्या। वठे ई केन्द्रीय मंत्री भूपेन्द्र यादव अलवर मांय नमो युवा रन ने हरी झंडी दिखाई। जोधपुर मांय केन्द्रीय मंत्री गजेन्द्र सिंह शेखावत गौशाला मैदान ऊँ नमो युवा रन मैराथन ने रवाना कर्या। मैराथन मांय केन्द्रीय मंत्री श्री शेखावत, सांसद राजेन्द्र गहलोत समेत जन नुमाइन्दा अर नौजवान हिस्सो लियो। नशा मुक्त भारत थीम माथे व्हे ई दौड़ ने जयपुर रा अमर जवान ज्योति ऊँ मुख्यमंत्री भजनलाल शर्मा हरी झंडी दिखाई। इण रे पछे मुख्यमंत्री सीकर रा सांवली पूग्या। जठे वणा हजारां नौजवानां ने नशा ऊँ दूर रहवण री शपथ दिरायी। सेवा पखवाड़ा रा तैत तहत नशा मुक्ति शपथग्रहण कार्यक्रम मांय बोलता वणा नौजवानां ऊँ किणी तरह रो नशो नी करण री अरज करी। साथै ई कह्यो के युवावां रा सपना ने साकर करण सारू केन्द्र अर राज्य सरकार पूरी तरह तियार है। झुंझुनूं मांय भी मैराथन मांय जिला कलेक्टर डॉ. अरूण गर्ग ठावां रहवण वाळा प्रतिभागियां ने इनाम दिया। जैसलमेर मांय ई निःशुल्क चिकित्सा शिविर अर नमो युवा रन रो आयोजन करी ज्यो। भीलवाड़ा मांय भाजपा दफ्तर माथे लगायी ज्यी नुमाइश रो उद्घाटन सांसद सी.पी. जोशी कर्यो।