पैली रा राष्ट्रपति अर ख्यातनाम शिक्षाविद् डॉ. सर्वपल्ली राधाकृष्णन रो जनम दिन शुक्रवार ने देशभर मांय शिक्षक दिवस रा रूप मांय मनायी ज्यो। नुवी दिल्ली मांय व्ह्या राष्ट्रीय शिक्षक पुरस्कार जळसा मांय राष्ट्रपति द्रौपदी मुर्मु ठावा काम करण वाळा 45 शिक्षकां रो सनमान करयो। ईं मौके वणा कयो के शिक्षा परिवार, समाज अर देश रा विकास मांय एक अमोल योगदान देवे है। राष्ट्रपति कह्यो के बेटियां री चोखी शिक्षा ऊं ई देश रा विकास मांय महिलावां री अगवा भूमिका मिल सके है। श्रीमती मुर्मू अजे रा सालां मांय ऊंची शिक्षा दाखिला मांय बालिकावां री बधती तादाद माथे खुशी जतायी। जळसा मांय राजकीय बालिका उच्च माध्यमिक विद्यालय टपूकड़ा री प्रधानाचार्य नीलम यादव ने ई राष्ट्रीय शिक्षक पुरस्कार ऊं सनमानित करी ज्या। श्रीमती यादव ने शिक्षा री गुणवत्ता मांय सुधार अर पढेसरां रा शैक्षिक विकास कानी करी ज्या ठावा कामां सारू ओ ईनाम दीरी ज्यो है। केन्द्रीय शिक्षा मंत्री धर्मेंद्र प्रधान गुरुआं ने बधाई देवता कयो के शिक्षकां री करड़ी मेहनत अर समर्पण ऊं ठावो बधावो मिल्यो है। जिण ऊं राष्ट्रीय विकास ने गति मिली है। शिक्षक दिवस माथे जयपुर मांय व्हीया आयोजित राज्य थर रा कार्यक्रम मांय मुख्यमंत्री भजनलाल शर्मा गुरूआं ने देश समाज रा निर्माणकर्ता बतावता कयो के देश अर समाज री प्रगति शिक्षकां रा हाथां मांय है। जळसा मांय ठावी सेवावां सारू प्रदेशभर रा चुणी ज्या शिक्षकां रो सन्मान करी ज्यो। स्कूल शिक्षा महकमा कानी ऊं व्ह्या कार्यक्रम मांय उपमुख्यमंत्री अर तकनीक अर उच्च शिक्षा मंत्री डॉ. प्रेमचन्द बैरवा अर शिक्षा मंत्री मदन दिलावर ई भेळा व्ह्या। राज्यपाल हरिभाऊ बागड़े शिक्षक दिवस माथे प्रदेश रा गुरूजनां ने शुभकामनावां देवता शिक्षकां ने पढेसरां रो जीवन गढ़ण अर वां ने संस्कारवान करण वाळा बताया। जैपर मांय व्हीया एक जळसा मांय राज्यपाल नुवी शिक्षा नीति माथे बतळ करता कयो के आ राष्ट्र विकास ऊं जुड़ी है। वणा कयो के शिक्षक, पढेसर अर समाज रा हितां रा आलोक मांय तैयार करी ज्या है।