पहलगाम आतंकी हमला रे खिलाफ प्रदेश मांय ई न्यारा-न्यारा संगठनां अर संस्थावां री ओर ऊं गुरूवार ने ई विरोध प्रदर्शन अर श्रद्धांजलि रा कार्यक्रम राख्यी ज्या। वारदात रे खिलाफ जयपुर मांय कारोबारियां रा संगठनां अर खुद सेवक संगठनां री ओर ऊं मार्च निकाळ र प्रदर्शन करी ज्यो। भरतपुर रा शहीद स्मारक माथे जनता मोमबत्तियां जळा र पहलगाम आतंकी घटना री निन्दा कीनी। ईं दौरान कारोबारी काळी पट्टी बांध र दुःख जतायो। जिला मुख्यालय माथे प्रार्थना सभा राख र ईं हमला मांय मरण वाळां री आत्मा री शांति सारू मौन राख्यी ज्यो। सवाईमाधोपुर मांय हम्मीर चौक माथे लोग तिरंगा झण्डा हाथ मांय ले र ईं वारदात मांय जान गंवा देवण वाळां री आत्मा री शांति री प्रार्थना कीनी। झालावाड़ मांय बार एसोसिएशन री ओर ऊं विरोध रैली निकाळी ज्सी अर जिला कलेक्टर ने पानडी सूंपी ज्यी। राजस्थान हाईकोर्ट री जोधपुर पीठ मांय वकील प्रदर्शन कर र सरकार ऊं पहलगाम आतंकी हमला रा ज़िम्मेदार लोगां रे खिलाफ करड़ी कार्रवाई री मांग कीनी। ईं बीचे, हमला मांय मर्या जयपुर रा रेहवासी नीरज उधवानी रो गुरूवार ने पूरा मान सागे दाग कर दियो ज्यो। राज्यपाल हरिभाऊ बागड़े, विधानसभा अध्यक्ष वासुदेव देवनानी, मुख्यमंत्री भजनलाल शर्मा, केन्द्रीय मंत्री गजेन्द्र सिंह शेखावत अर राज्य मंत्रिमंडल रा सदस्य उधवानी ने श्रद्धांजलि दीनी। मुख्यमंत्री इण ने कायराना हरकत बताता थकां भरोसो जतायो के ईं हमला रा दोषियां ने करड़ी सज़ा दी जावेला।
राज्य रा पैली वाळा मुख्यमंत्री अशोक गहलोत अर कांग्रेस रा प्रदेश अध्यक्ष गोविंद सिंह डोटासरा ई उधवानी रा पिरवार वाळां ने सांत्वना दीनी। उधवानी रा दाग मांय मोटी तादाद मांय जनता अर मान्योड़ा लोग मौजूद रह्या। पहलगाम आतंकी हमला पाछे प्रदेश मांय ई सावचेती बधा दीरीजी है। पुलिस रा जवान गुरूवार ने केई ठौड़ां फ्लैगमार्च कीनो अर होटलां मांय रुकण वाळां री जांच करी ज्यी। पाकिस्तान ऊं लाग्योड़ी अंतर्राष्ट्रीय सरहद माथे ई बी.एस.एफ. चौकसी बध़ा दीनी है। म्हाणा जैसलमेर खबरनवीस बतायो के ज़िला मुख्यालय माथे ई पुलिस री ओर ऊं गुरूवार ऊं जांच रो अभियान चलायी ज्यो।
