देश रा करीब सात सौ ज़िलां मांय गुरूवार ने विकसित कृषि संकल्प अभियान सरु व्ह्यो। केंद्रीय कृषि मंत्री शिवराज सिंह चौहान ओडिशा मांय पुरी ऊं इण री सरुआत कीनी। ईं अभियान रो मकसद किसानां ने नुवी तकनीक री जाणकारी देवणो, सरकारी योजनावां रो प्रचार करणो, मिट्टी रा स्वास्थ्य, संतुलित खाद अर कुदरती खेती रो महत्त्व समझावणो, किसानां ऊं नवाचार री जाणकारी लेवणो अर किसानां अर कृषि वैज्ञानिकां बीचे सीधी बातचीत करावणो है। केन्द्रीय कृषि राज्यमंत्री भागीरथ चौधरी प्रदेश मांय ईं अभियान री सरूआत अजमेर ज़िला रा रलावता गांव ऊं कीनी। वे जागरुकता रथ ने रवाना कीनो। ईं मौके श्री चौधरी कह्यो के ओ केवल अभियान नी है बल्कि किसानां री बरकत अर खेती-बाड़ी मांय नवाचार जोड़बा वाळो राष्ट्रीय संकल्प है। वे किसानां ऊं ईं अभियान ऊं जुड़ र नुवी तकनीकां सीख र खेती मांय काम लेवण री अपील कीनी। कार्यक्रम मांय कृषि मंत्री किरोड़ी लाल मीणा कह्यो के विज्ञान अर किसान री ईं भेळी कोशिश ऊं किसानां ने उन्नत अर सक्षम बणाया जा सके है। बारह जून तांई चालण वाळा ईं अभियान रे मार्फत देश रा बीस राज्यां मांय सात सौ ज़िलां रा पैंसठ हजार ऊं बत्ता गांवां मांय वैज्ञानिकां री टीमां करीब डेढ करोड़ किसानां सागे सीधो संपर्क करेला।