देश-प्रदेश मांय गुरूवार ने विश्व पर्यावरण दिवस रे मौके केई कार्यक्रम राख्यी ज्या। इण रो ईं साल साल रो मुद्दो ‘‘प्लास्टिक प्रदूषण को समाप्त करना’’ राख्यी ज्यो। विश्व पर्यावरण दिवस रे मौके प्रधानमंत्री नरेंद्र मोदी नई दिल्ली रा भगवान महावीर वनस्थली पार्क मांय खास वृक्षारोपण अभियान री सरूआत कीनी। श्री मोदी एक पेड़ माँ के नाम पहल रा तहत बरगद रो पौधो रोप्यो। ओ पौधो अरावली ग्रीन वॉल परियोजना रा भाग रा तौर ऊं लगायी ज्यो, जिण रो मकसद अरावली पर्वतमाला रा राजस्थान, दिल्ली, हरियाणा अर गुजरात समेत चार राज्यां रा 29 ज़िलां मांय सात सौ किलोमीटर लम्बा हलका ने हरा-भरा बणावणो है। ईं परियोजना रो मकसद अरावली पर्वत श्रृंखला रे आरे-सारे रा पाँच किलोमीटर रा बफर हलका ने हरित बणावणो ई है। ईं सागे ई इण रो मकसद जंगलात हलका ने बधावणो अर जल निकायां ने और बेहतर बणावण सागे अरावली री जैव विविधता ने बधावो देवणो है। प्रधानमंत्री मोदी पर्यावरण री हिफ़ाज़त ऊं जुड़्यो खास वीडियो साझा कीनो। वे पर्यावरण ने हर्यो-भर्यो अर बेहतर बणावण सारू ज़मीनी स्तर माथे काम करण वाळां सगळा लोगां री सराहवणा कीनी। विश्व पर्यावरण दिवस रे मौके प्रदेश मांय केई कार्यक्रम राख्यी ज्या। राज्य स्तर रो जळसो जयपुर रा राजस्थान इंटरनेशनल सेंटर मांय राख्यी ज्यो, जिण मांय मुख्यमंत्री भजनलाल शर्मा पांच लवकुश वाटिकावां रो वर्चुअल तरीका ऊं उद्घाटन कीनो। मुख्यमंत्री जयपुर रा नाहरगढ मांय बीड़ पापड़ लैपर्ड सफारी रो ई उद्घाटन कीनो। वे राज्य रा 54 स्थानीय निकायां मांय हवा री गुणवत्ता मांय सुधार री कोशिशां सारू साढे 13 करोड़ रूप्या ई भेज्या। ईं दौरान जयपुर कने सांगानेर मांय सामान्य अपशिष्ट उपचार संयंत्र ई जनता ने सूंपी ज्यो। मुख्यमंत्री इलेक्ट्रोनिक कचरो भेळो करण रा अभियान री सरूआत कीनी अर ई-वेस्ट ड्राइव गाड़ियां ने हरी झंडी बता र रवाना कीनी। कार्यक्रम मांय राजस्थान प्रदूषण नियंत्रण मंडल री ओर ऊं बणायी ज्या ऑटो रिन्यूवल सिस्टम रो ई उद्घाटन करी ज्यो। ईं सागे ई गन्दो पाणी साफ़ करण रा छह नुवा प्लांट अर 54 नुवी सड़क सफाई मशीनां ई जनता ने सूंपी ज्यी। इंर् मौके वे लोगां ऊं पाणी अर पर्यावरण ने बचावण सारू योगदान ऊं जुड़्या काम करता थकां खुद रा वीडियो सोशल मीडिया माथे पोस्ट करण री अपील कीनी। कार्यक्रम मांय वन अर पर्यावरण मंत्री संजय शर्मा, संसदीय कार्यमंत्री जोगाराम पटेल, सांसद मंजू शर्मा, मुख्य सचिव सुधांश पंत, वन विभाग रा अहलकार, खुद सेवक समूहां रा नुमाइन्दा अर पर्यावरण रा हलका मांय चोखो काम करण वाळा लोग मौजूद रह्या। राज्यपाल हरिभाऊ बागडे़ कह्यो है के प्रदूषण रोकण री सगळां री ज़िम्मेदारी है। वे पर्यावरण बचावण ने सगळां री जिम्मेदारी बताता थकां कह्यो के ईं सारू हर लेवल माथे कोशिश करी जावणी चाहिजे। विश्व पर्यावरण दिवस रे मौके जयपुर रा एक गैर-सरकारी शैक्षणिक संस्थान मांय विज्ञान भारती री ओर ऊं राख्यी ज्या कार्यक्रम मांय राज्यपाल जनता ऊं बत्ता ऊं बत्ता पेड़-पौधा रोपण अर वां री सार-संभाल करण री अपील कीनी। ईं मौके राज्यपाल पर्यावरण बचावण सारू बेहतरीन काम करण वाळां ने “वृक्ष मित्र“ पुरस्कार दे र नवाज़ा। विश्व पर्यावरण दिवस रे मौके आकाशवाणी रा कार्यक्रम सुणबा वाळा ई वां रा विचार बताया। पद्मश्री मान ऊं नवाज़ी ज्या श्याम सुंदर पालीवाल प्रधानमंत्री रा एक पेड़ मां के नाम अभियान ने प्रेरणा देवण वाळो बताता थकां वां री सराहवणा कीनी। पाणी बचावण सारू काम करण बाबत् खास ओळखाण राखण वाळा जयपुर रा पर्यावरणविद् पद्मश्री लक्ष्मण सिंह ई वां री भावनावां जतायी।