डूंगरपुर ने साफ सफाई रा हलका मांय खास काम सारू सुपर स्वच्छ लीग सिटी रा मान ऊं नवाजी ज्यो है। राष्ट्रपति द्रौपदी मुर्मू आज नई दिल्ली मांय राख्यी ज्या राष्ट्रीय समारोह मांय डूंगरपुर नगरपरिषद ने ओ ईनाम दीनो। ईं मौके राष्ट्रपति कह्यो के स्वच्छता देश री सांस्कृतिक चेतना री बुनियाद है। वे स्वच्छ भारत मिशन रा तहत राज्यां अर केंद्र रा राज वाळा प्रदेशां री कोशिशां री सराहवणा करता थकां कह्यो के आ एक सफल पहल साबित व्ही है। ध्यानजोग है के डूंगरपुर राजस्थान रो एकलो शहर है जिण ने राष्ट्रीय स्वच्छता सर्वेक्षण 2024 रा तैत नवाजी ज्यो है। स्वायत्त शासन मंत्री झाबरसिंह खर्रा, डूंगरपुर नगर परिषद रा सभापति अमृत कलासुआ अर आयुक्त सांवरमल आबासरा ओ ईनाम लीनो। आ उपलब्धि हासिल करण परां डूंगरपुर नगर परिषद रा पार्षद ईं उपलब्धि रो श्रेय जनता, नगर परिषद रा कर्मचारियां अर सफाई कर्मचारियां ने दीनो।