जयपुर मांय दीतवार सूं द ग्रेट इंडियन ट्रेवल बाजार रो 14वों संस्करण राख्यो जा रह्यो है। तीन दिन तांई चालबा वाळा इण आयोजन रे तैत दीतवार ने ’मीट इन इंडिया कॉन्क्लेव’ मांय केंद्रीय संस्कृति अर पर्यटन मंत्री गजेन्द्र सिंह शेखावत कह्या के मोदी सरकार री नीतियां सूं देश मांय पर्यटन रा हलका मांय केई नुवां काम व्ह्या है। वणा हाल ही मांय पहलगाम मांय व्ह्या हमला सूं उपज्या हालात माथे कह्या के भारत बेगी ही जम्मू-कश्मीर समेत देशभर मांय पर्यटन रा हलका मांय नुवी ऊंचाईयां माथे पूगेला।श्री शेखावत कह्या के आज रो भारत विश्वस्तरीय कन्वेशन सेंटर्स अर उच्च स्तरीय आतिथ्य सेवावां सूं सुसज्जित है, इण रे सागे ही बेहतर हवाई अर रेल संपर्क रे सागे एक समृद्ध सांस्कृतिक विरासत रा रूप मांय भी दुनिया खातर आकर्षण रो केंद्र है। इण भांत रो संयोजन दुनिया रा घणा थोड़ा देशां रे कन्ने है। कार्यक्रम मांय उपमुख्यमंत्री दिया कुमारी, नीति आयोग री उपाध्यक्ष सुमन बेरी समेत पर्यटन क्षेत्र सू जुड़्या विशेषज्ञ अर न्यारा-न्यारा संगठनां रा नुमाइन्दा मौजूद रिया। इण आयोजन रो औपचारिक उद्घाटन दीतवार ने सिंज्या साढे सात बज्या व्हेला। बतायो जावे है के द ग्रेट इंडियन ट्रेवल बाजार मांय पर्यटन अर ट्रेवल सूं जुड़ी तीन सौ सूं बत्ती स्टॉल्स लगाई गई है। तीन दिन री इण प्रदर्शनी मांय देश-दुनिया रा पर्यटन व्यवसायी, टूर ऑपरेटर अर ट्रेवल विशेषज्ञ भाग ले रह्या है।