राज्य मांय व्हे रही घणी बिरखा रे कारण न्यारा-न्यारा ज़िलां मांय साखां मांय व्ह्या खराबा रा मामला मांय गुरूवार ने विधानसभा मांय ज़ोरदार हंगामो व्ह्यो। शून्यकाल रे दौरान कांग्रेस स्थगन प्रस्ताव रे मार्फत अणूती बिरखा ऊं किसानां रा नुकसाण अर मुआवज़ा रो मुद्दो ज़ोर-शोर ऊं उठायो। विपख रा सदस्य पीड़ित काश्तकारां ने पर्याप्त मुआवज़ो देवण रो ऐलाण तुरत ई करण री मांग कीनी। कृषि मंत्री डॉ. किरोड़ी लाल मीणा सदन ने बतायो के पड़ित किसानां ने मुआवज़ो देवण री व्यवस्था करी ज्यी है अर ईं सारु प्रशासनिक लेवल माथे ज़रुरी जतन कर्या जा रह्या है।
विपख रा नेता टीकाराम जूली कृषि मंत्री रा बयान ने अपर्याप्त बताता थकां मुआवज़ा री रकम बधावण री मांग कीनी। वे कह्यो के भारी तबाही रे कारण सरकार कानी ऊं करी ज्यो राहत रो ऐलाण किसानां सारु काफ़ी नी है।
संसदीय कार्यमंत्री जोगाराम पटेल खबरनवीसां सागे बातचीत करता थकां विपख रा आरोपां ने गलत बतायो। वे कह्यो के राज्य सरकार घणी बिरखा रा असर वाळा हलकां मांय जनता ने साता देवण सारू लगातार काम कर रही है। मंत्री बतायो के ईं सारु ज़िलां रा प्रभारी मंत्री काल तांई आप-आप रा ज़िलां रो दौरो कर र नुकसाण रो जायज़ो लेवेला।
विधानसभा गुरूवार ने विपख रा सदस्यां रा शोरगुल बीचे आधा घंटा मांय तीन बिल पास कर दीना। ईं पाछे सदन री कार्यवाही 8 सितम्बर तांई टाळ दीरीजी। राज्य मांय व्हे रही ज़ोरदार बिरखा रा मामला ने लेर विपख रा सदस्य शून्यकाल ऊं ई हंगामो करण लाग्या। नाराबाज़ी बीचे ई मंत्री सुमित गोदारा कारखाना संशोधन बिल 2025 सदन मांय पेश कीनो। वे कह्यो के मजूरां रा संगठनां सागे बातचीत रे दौरान मिल्या सुझावां रे मुजब मजूरां ने फायदो अर रियायत दी जा रही है। सदन ईं सागे ई राजस्थान विनियोग बिल 2025 अर राजस्थान माल अर सेवा कर (द्वितीय संशोधन) बिल 2025 ध्वनि मत ऊं पास कर दीना।