केन्द्र सरकार प्रधानमंत्री धन धान्य कृषि योजना चलावण रो फैसलो कीनो है। केन्द्रीय मंत्री अश्विनी वैष्णव बुधवार ने खबरनवीसां ने आ जाणकारी दीनी। वे प्रधानमंत्री नरेन्द्र मोदी री सदारत मांय व्ही केन्द्रीय मंत्रीमण्डल री मीटिंग मांय करी ज्या फैसलां री जाणकारी दे रह्या हा। श्री वैष्णव बतायो के एनटीपीसी लिमिटेड री नवीकरणीय ऊर्जा रा हलका मांय 20 हजार करोड़ रूप्या रा निवेश री योजना ने ई मंजूरी दे दीरीजी है। मंत्री बतायो के मंत्रीमण्डल री मीटिंग मांय एनएनसी इण्डिया लिमिटेड ने 7 हजार करोड़ रूप्या री मदद देवण रो फैसलो ई करी ज्यो। श्री वैष्णव बतायो के 100 ज़िलां मांय मौजूदा माली साल ऊं छः साल सारू चलायी जावण वाळी पीएम धन धान्य योजना माथे 24 हजार करोड़ रूप्या खर्च कर्या जावेला। इण मांय 11 मंत्रालयां ऊं जुड़ी 36 योजनावां शामिल करी जावेला। श्री वैष्णव बतायो के भारत स्वच्छ ऊर्जा हलका मांय तेज़ी ऊं काम कर रह्यो है। वे बतायो के देश स्वच्छ ऊर्जा क्षमता रो आधो काम पांच साल पैली ई पूरो कर लीनो है। केन्द्रीय मंत्रिमण्डल अन्तर्राष्ट्रीय अंतरिक्ष स्टेशन ऊं गु्रप कैप्टन शुभांशु शुक्ला रे पाछा आवण ऊं जुड़्यो प्रस्ताव पास कीनो। प्रस्ताव मांय कही ज्यो के शुभांशु रो आईएसएस माथे 18 दिन रो ऐतिहासिक मिशन पूरो करणो भारत रा अंतरिक्ष कार्यक्रम सारू नुवो अध्याय है।