केन्द्रीय मंत्री मनोहर लाल खट्टर मंगलवार ने जयपुर मांय मुख्यमंत्री भजन लाल शर्मा सागे राज्य मांय शहरी विकास अर ऊर्जा हलका री योजनावां रा तैत कराया जा रह्या कामां रो जायज़ो लीनो। मीटिंग मांय केन्द्र अर राज्य सरकार रा आला अहलकार ई मौजूद रह्या। मीटिंग मांय मुख्यमंत्री प्रदेश मांय बिजली तंत्र ने मज़बूत करण अर बिजली री ज़रुरी पूर्ति सारु उत्पादन इकाइयां अर प्रसारण तंत्र रो रख-रखाव तैय करण री जरूरत बतायी। श्री शर्मा कह्यो के राज्य सरकार किसानां ने खेती-बाड़ी सारू दिन मांय ई बिजली मुहैया करावण रो लक्ष्य साल 2027 तांई हासिल करण सारू काम कर रही है। मुख्यमंत्री कह्यो के शहरी बुनियादी ढ़ांचा ने मज़बूत बणावण रा काम मांय ई केन्द्र सरकार ऊं पूरी मदद मिल रही है। श्री शर्मा केन्द्रीय मंत्री श्री खट्टर सागे स्वच्छ भारत मिशन, ई-बस सेवा, जयपुर मेट्रो रेल, अमृत मिशन 2.0 अर प्रधानमंत्री आवास योजना समेत विकास री न्यारी-न्यारी योजनावां ने आगे बधावण अर वां रा माली मॉडल रा बारा मांय ई चर्चा कीनी। मीटिंग मांय श्री खट्टर कह्यो के राजस्थान अक्षय ऊर्जा रा हलका मांय अगाड़ी है। ईं दौरान ऊर्जा हलका मांय उत्पादन, वितरण अर ट्रांसमिशन सिस्टम ने मज़बूत बणावण री रणनीति माथे ई विचार करी ज्यो। वे राज्य मांय पी.एम. कुसुम योजना रा तहत कर्या जा रह्या काम री ई सराहवणा कीनी। मीटिंग पाछे दिल्ली जाती बगत हवाई अड्डा माथे खबरनवीसा सागे बातचीत करता थकां श्री खट्टर पहलगाम आंतकी हमला रा बारा मांय कह्यो के एड़ी वारदातां ओजू व्हेवण ऊं रोकण सारू करड़ा कदम उठाया जावेला।