एयर ऑपरेशन महानिदेशक एयर मार्शल ए.के. भारती कह्या के भारत री लड़ाई आतंकवादियां अर उण रा सहयोगी ढांचा सूं है, नी के पाकिस्तानी सेना सूं। ऑपरेशन सिंदूर रा बारा मांय दिल्ली मांय राख्यी एक प्रेस वार्ता मांय वणा बताया के ऑपरेशन सिंदूर रे दौरान सेना नागरिक अर सैन्य बुनियादी ढांचा ने किण भांत कम ऊं कम नुकसान पूगायो है। वणा भारतीय सशस्त्र बलां री एकीकृत वायु रक्षा प्रणालियां रा बारा मांय बताया के इण मांय सेना, नौसेना अर वायु सेना री रक्षा प्रणालियां भेळी है। प्रेस वार्ता ने सम्बोधित करता थकां डीजीएमओ लेफ्टिनेंट जनरल राजीव घई बताया के भारत रो एयर डिफेंस सिस्टम दुश्मन रा ड्रोन, लड़ाकू विमान अर मिसाइलां ने नाकाम कर्यो है। इण सूं देश रो कम ऊं कम नुकसान व्ह्यो। वे कह्या के भारतीय सशस्त्र बल इण खातर पूरी भांत तैयार हो। डीजीएमओ श्री घई ऑपरेशन मांय इमदाद खातर बी.एस.एफ. री सरावणा करी। वे कह्या के ऑपरेशन सिंदूर रे दौरान तीन्यू सेनावां रे बीच पूरो तालमेल रह्यो। वे कह्या के सेना ने सरकार, महकमां एजेंसियां अर देश रा 140 करोड़ लोगां रो पूरा समर्थन हो। नौसेना संचालन महानिदेशक वाइस एडमिरल ए.एन. प्रमोद कह्या के नौसेना एक समग्र नेटवर्क बल रा रूप मांय काम करे है जो सगळा हलका सूं होबा वाळा खतरां सूं एक साथ निपट सके है। वे कह्या के भारतीय नौसेना पहलगाम आतंकी घटना रे तुरंत पछे आप री मिसाइल रोधी अर विमान रोधी रक्षा क्षमता रो प्रदर्शन कर्यो। वाइस एडमिरल प्रमोद कह्या के भारतीय नौसेना पाकिस्तानी हवाई हमला ने मकरान तट रे कन्ने काबू मांय रहबा ने मजबूर कर्यो जिण सूं समुद्री हलका रो खतरो टळ ग्यो।